იუსტიციის ყოფილი მინისტრი, ზურაბ ადეიშვილი ამბობს, რომ ხელისუფლებაში ყოფნის პერიოდში ბიზნესმენ ბიძინა ივანიშვილის თხოვნით კონკრეტულ ადამიანებს აკავებდნენ. ამის შესახებ მან რუსთავი 2-ის ყოფილ დირექტორთან, ნიკა გვარამიასთან ინტერვიუს დროს ისაუბრა.

როგორც ადეიშვილი ამბობს, ივანიშვილის თხოვნით ისინი საქმეებს აღძრავდნენ, მაგრამ არც ერთი საქმე უსაფუძვლო არ ყოფილა და უმიზეზოდ ციხეში არავის სვამდნენ. მისივე თქმით, უშუალოდ თვითონ ივანიშვილს არასდროს შეხვედრია.

ნიკა გვარამია: ვინმე სხვა ეკონტაქტებოდა ივანიშვილს ხელისუფლებიდან?

ზურაბ ადეიშვილი: პრეზიდენტი და ვანო.

გვარამია: შენ არ გინახავს, ხო?

ადეიშვილი: არა.

გვარამია: ადამიანების დაჭერას რომ გთხოვდა, ხოლმე?

ადეიშვილი: შემოთვლით.

გვარამია: რატომ იჭერდით?

ადეიშვილი: კარგი კითხვაა. ყველა ის გვარები, რომელსაც შემოგვითვლიდა და ეს ბევრი იყო, არ იყო ცოტა, ყველა ამ ადამიანს გარკვეული [დანაშაული ჰქონდა]. არასდროს დაგვიწყია სისხლისსამართლებრივი დევნა, რომელსაც რეალურად არ ჰქონდა ჩადენილი კონკრეტული ქმედება. მაგას არ დავუშვებდით. უნდა ვაღიაროთ, რომ იყვნენ ადამიანები, რომელთა მიმართაც წინასწარ პატიმრობას ვიყენებდით იმის გამო, რომ მან გვთხოვა, მაგრამ, რეალურად პოლიტიკა იყოს სხვა.

გვარამია: ერთი ქეისი მაინც ივანიშვილის...

ადეიშვილი: ერთ პალმის ხის მოპარვაზე დაგვაჭერინა ვიღაცა, მაგრამ ის პალმის ხე, თითქოს 1000 ლარი ღირდა თუ რაღაცა...

გვარამია: ერთი პალმის გამო დაგაჭერინა მასთან მომსახურე ადამიანი?

ადეიშვილი: მე მგონი, ნათესავი იყო. არ მახსოვს.

ზურაბ ადეიშვილს ე.წ. ცხრაწლიანი რეჟიმის ერთ-ერთ მთავარ პირად განიხილავენ. წინა ხელისუფლების დროს ის სხვადასხვა დროს იყო გენერალური პროკურორი და იუსტიციის მინისტრი. 2017 წელს ზურაბ ადეიშვილი ვანო მერაბიშვილთან ერთად აკურას ღვინის ქარხნის ჩამორთმევის საქმეზე დამნაშავედ სცნეს და 2 წლით თავისუფლების აღკვეთა მიესაჯა. ამნისტიის შესახებ საქართველოს კანონის გამოყენებით საბოლოოდ განესაზღვრა 1 წლით და 6 თვის ვადით თავისუფლების აღკვეთა.