ეროვნული ბანკის პრეზიდენტი, კობა გვენეტაძე განმარტავს, რომ ლარის გაუფასურება, "საგარეო შოკს" უკავშირდება და ერთ-ერთი მნიშვნელოვანი ფაქტორი ტურისტების რაოდენობის შემცირებაა. ეროვნული ბანკის პრეზიდენტი აღნიშნავს, რომ არსებული გაცვლითი კურსი არის იმაზე უფრო მეტად გაუფასურებული, ვიდრე საგარეო შოკის ზომაა.

"დღეს საქართველო გადის საგარეო შოკს. საქართველოში ტურისტული შემოდინებების მოსალოდნელი რაოდენობა შემცირებულია. ეს რა თქმა უნდა, გავლენას ახდენს გაცვლით კურსზე. რადგანაც შოკები ყოველთვის არის მოსალოდნელი მიმართულება, მნიშვნელოვანია დედოლარიზაცია. იმ შემთხვევაში, თუ შემოსავალი არის ეროვნულ ვალუტაში სესხები აღებული უნდა იქნას ეროვნულ ვალუტაში", — ამბობს გვენეტაძე.

მისივე თქმით, საქართველომ ერთხელ უკვე გაიარა ასეთი პერიოდი 2014-2016 წლებში:

"იმ შემთხვევაში თუ ჩვენ დავინახეთ, რომ კურსის განვითარება ახდენს გავლენას ინფლაციაზე, ეროვნული ბანკი ჩაერევა და გამოიყენებს ბერკეტებს რომელიც გააჩნია".

30 ივლისის ოფიციალური გაცვლითი კურსით, ერთი დოლარის ღირებულება 2,9346 ლარია, ხოლო ერთი ევროს ფასი 3,2642 ლარი გახდა. კომერციულ ბანკებსა და ვალუტის გადამცვლელ ჯიხურებში ერთი დოლარის ფასი თითქმის 3 ლარს აღწევს.