24 ივლისს #8, გლდანის სასჯელაღსრულების დაწესებულებაში პატიმარი გარდაიცვალა. ოჯახის წევრებმა რუსთავი 2-ს უთხრეს, რომ გარდაცვლილს ფიზიკური ძალადობის კვალი ეტყობა, "ბეჭები აქვს ჩალურჯებული" და "თავი გადახეთქილი".

პენიტენციურ სამსახურში პატიმრის გარდაცვალებას ადასტურებენ და შესაძლო ძალადობასთან დაკავშირებით არ საუბრობენ.

"ბრალდებული გ.ჯ. პენიტენციური დაწესებულების საკანში 6 თანამესაკნესთან ერთად ელექტრო-ვიზუალური მეთვალყურეობის ქვეშ იმყოფებოდა. 08:25 საათზე ბრალდებულთან საკანში გამოიძახეს მორიგე ექიმი. გ.ჯ. იყო უკონტაქტო, არ აღენიშნებოდა პულსაცია პერიფერიულ და მაგისტრალურ სისხლძარღვებზე. დაუყოვნებლივ დაწყებული იქნა სარეანიმაციო ღონისძიებები, რის პარალელურადაც ბრალდებულთან სასწრაფო სამედიცინო დახმარების ბრიგადა გამოიძახეს. გაკეთდა ადრენალინის ინექცია, თუმცა მიუხედავად სარეანიმაციო ღონისძიებებისა, ბრალდებული გარდაიცვალა", — აღნიშნულია პენიტენციური სამსახურის მიერ On.ge-სთვის მიწოდებულ ინფორმაციაში.