რესპუბლიკური პარტიის ერთ-ერთი ლიდერი ლევან ბერძენიშვილი გაზეთ რეზონანსთან ინტერვიუში აცხადებს, რომ წინასაარჩევნოდ გამოქვეყნებული კვლევების შედეგები ერთმანეთს არ ემთხვევა, რაც მათ სანდოობას ეჭვის ქვეშ აყენებს:

"ერთი კვლევის თანახმად რესპუბლიკური პარტიის რეიტინგი 0,7%-ია, სხვა კვლევაში კი ეს მაჩვენებელი 8,7%-ს უდრის. ამის შემდეგ რომელ სანდოობაზეა ლაპარაკი. მმართველი გუნდი ამტკიცებს, რომ თუ არა ის, არჩევნებს "ბუა" ნაციონალური მოძრაობა მოიგებს, ეს მათი სტრატეგია მცდარი და სასაცილოა. მომავალ პარლამენტში მინიმუმ 5 ან 7 პოლიტიკური ძალა იქნება, ეს გარდაუვალია".

რესპუბლიკელების ლიდერის თქმით, ქართულ ოცნებას მის მიერ მართული მედიასაშუალებებით საზოგადოება შეცდომაში შეჰყავს:

"მმართველი გუნდი მართული მედიასაშუალებებით ცდილობს დაარწმუნოს საზოგადოება, რომ მხოლოდ მათ აქვთ მოგების შანსი, არგუმენტად კი ალოგიკური და ელემენტარული არითმეტიკისგან აცდენილი კვლევების შედეგები მოჰყავთ, რაც მათ კომიკურ მდგომარეობაში აგდებს. თუმცა, მსგავსი ქმედებები სასაცილო არაა, ეს მავნებლობაა და მიზანი საზოგადოებაში ნიჰილიზმის დათესვაა. მსგავსი ქმედებები, ჩემი აზრით, საკანონმდებლო დონეზე უნდა იყოს აკრძალული".

ლევან ბერძენიშვილმა პარტიიდან გასულ წევრებზეც ისაუბრა და განაცხადა, რომ ისინი იმიტომ შევიდნენ რესპუბლიკელებში რამდენიმე თვის წინ, რომ წინასაარჩევნოდ დემონსტრაციულად დაეტოვებინათ პარტია.