ნაციონალური მოძრაობის დეპუტატი ნიკა მელია, რომელსაც პროკურატურა ძალადობრივი ჯგუფის ხელმძღვანელობას ედავება, 20 ივნისის ღამის ვიდეომასალას აქვეყნებს. დეპუტატის თქმით, ეს კადრები ანადგურებს ხელისუფლების პროპაგანდას იმაზე, რომ სროლა პარლამენტში შეჭრის მცდელობას მოყვა.

მელია წერს, რომ უწყვეტ კადრებში ჩანს, რომ სროლა მაშინ დაიწყო, როცა ხელისუფლებასთან მოლაპარაკებას აპირებდნენ.

მას შემდეგ, რაც სპეცრაზმმა რუსთაველზე აქცია დაშალა ხელისუფლების წარმომადგენლები აცხადებდნენ, რომ ძალის გამოყენების აუცილებლობა პარლამენტზე შტურმმა გამოიწვია. პროკურატურის მსგავსად, შტურმის დაწყებაში ისინი ნიკა მელიას ადანაშაულებდნენ.

ნიკა მელიას საქმე

პროკურატურა მელიას პატიმრობას სწორედ 20 ივნისის აქციის საქმეზე ითხოვს. კერძოდ, დეპუტატს ბრალი აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის სისხლის სამართლის კოდექსის 225-ე მუხლის პირველი და მეორე ნაწილებით წაუყენეს.

უწყება აცხადებს, რომ მელია მოუწოდებდა დემონსტრანტებს პარლამენტში შეჭრილიყვნენ. მელიას კი ამბობს, რომ არ მოუწოდებია და კითხვა დასვა.

27 ივნისს თბილისის საქალაქო სასამართლომ მელიას 30 ათასი ლარის ოდენობის გირაო შეუფარდა. გარდა ამისა, მოსამართლემ მას სხვა შეზღუდვების დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

სააპელაციო სასამართლომ ნიკა მელიას საქმეზე არც დაცვის და არც ბრალდების მხარის სარჩელი არ დააკმაყოფილა და საქალაქო სასამართლოს მიერ დაწესებული შეზღუდვები ძალაში დატოვა. ამავე განჩინებით, მელიას შეზღუდვის ახალი სახე ელექტრონული მონიტორინგი დაემატა.