აშშ-ს დედაქალაქში ძლიერი წვიმის გამო დატბორილია ქუჩები. ამასთანავე, წვიმაა მერილენდისა და ვირჯინიას შტატებში. ათასობით ადამიანი ელექტროენერგიის გარეშეა დარჩენილი.

წვიმამ თეთრი სახლი ნაწილობრივ დატბორა. ტვიტერზე პრეზიდენტის ადმინისტრაციის დატბორილი სარდაფის ფოტოები გავრცელდა. წყალდიდობის გამო დაკეტილია აშშ-ს ეროვნული არქივი.

წვიმის გამო დატბორილია ათობით გზა და პოლიცია მძღოლებს ურჩევს მგზავრობისგან თავი შეიკავონ. ვაშინგტონის გარეუბანში წყალი ჩავიდა მეტროსადგურში. გარდა ამისა, შეფერხებით მუშაობდა რონალდ რეიგანის სახელობის აეროპორტი.