ლიბერალურმა ინტერნაციონალმა, რომელიც მსოფლიოს მასშტაბით 64 ქვეყანაში 106 ლიბერალური იდეოლოგიის პოლიტიკურ ორგანიზაციას აერთიანებს საქართველოში 20-21 ივნისს განვითარებული მოვლენები სახელმწიფოს მიერ სანქცირებულ ძალადობად შეაფასა. მათ გამოხატეს აღშფოთება მომხდართან დაკავშირებით და რუსეთისა და საქართველოს მთავრობის მიმართ გამაფრთხილებელი რეზოლუცია გაავრცელეს.

ლიბერალური ინტერნაციონალი აღნიშნავს, რომ საქართველოს მთავრობის ქმედებებმა "შეგნებულად შეუწყო ხელი" საკუთარ მოქალაქეებში და განსაკუთრებით ახალგაზრდობაში "ისტორიული უკმაყოფილობით გამოწვეული მღელვარების დაძაბვას". კერძოდ, იმ ფაქტით, რომ რუსეთის ფედერაციის დუმის პარლამენტარს საქართველოს პარლამენტის დარბაზში თავმჯდომარის სავარძლიდან სიტყვით გამოსვლის შესაძლებლობა მისცა.

გარდა ამისა, მიმდინარე მოვლენების გამო, ლიბერალური ინტერნაციონალი მოუწოდებეს საქართველოს მთავრობას, ხელი აიღოს პოლიტიკური ოპონენტების შევიწროებასა და დევნაზე და უზრუნველყოს ჯანსაღი დიალოგი კონფრონტაციის ნაცვლად.

ასევე, ლიბერალური ინტერნაციონალი მწუხარებას გამოთქვამს ვლადიმერ პუტინის მიერ ფრენების აკრძალვასთან დაკავშირებით და აცხადებს, რომ ეს იყო "დამამცირებელი ზომები საკუთარი მოქალაქეების მიმართ". მათი თქმით, ეს სოციალურ-კულტურულ და სავაჭრო-ეკონომიკურ სფეროებში რუსეთ-საქართველოს შორის ურთიერთობების შემდგომი გაუარესებას შეუწყობს ხელს.

ლიბერალური ინტერნაციონალი მოუწოდებს რუსეთის მთავრობას :

1. დაუყონებლივ გააუქმოს სანქციები, რომლებიც მოფიქრებულია არა მხოლოდ საქართველოს, არამედ საკუთარი ეკონომიკის საწინააღმდეგოდაც, სინამდვილეში კი მიმართულია საქართველოს დასასჯელად და მეზობელი ქვეყნის შიდა პროცესებში საკუთარი უხეში და სამარცხვინო ჩარევების გადასაფარად.
2. შეასრულოს საერთაშორისო ვალდებულებები, პატივი სცეს საქართველოს, როგორც სუვერენული სახელმწიფოს, საერთაშორისოდ აღიარებული საზღვრების ურღვევობას როგორც პოლიტიკურად, ისე ფიზიკურად და თავი შეიკავოს მცოცავი ანექსიისაგან ორივე მიმართულებით.
3. პატივი სცეს ქართველი ხალხის სუვერენულ უფლებას, თავად განსაზღვროს საკუთარი სახელმწიფოს მომავალი და თავად განსაზღვროს ქვეყნის საგარეო ორიენტაცია.

განცხადებაში წერია, რომ ლიბერალური ინტერნაციონალი მხარს უჭერს ქართველ ხალხს, მათ შორის ახალგაზრდებს, და მათთან ერთად საქართველოს რესპუბლიკურ პარტიას "სამართლიან პროტესტში". რესპუბლიკური პარტია ლიბერალური ინტერნაციონალის წევრია.

17 დღიანი პროტესტი

პარლამენტთან უკვე 17 დღეა მიმდინარეობს ანტიოკუპაციური აქცია #სირცხვილია. პროტესტი საქართველოში რუსეთის დუმის კომუნისტი დეპუტატის, სერგეი გავრილოვის ვიზიტსა და პარლამენტის სავარძელში დაჯდომას მოყვა. ამის გასაპროტესტებლად პარლამენტთან აქცია გაიმართა, რომელიც პოლიციასთან დაპირისპირებაში გადაიზარდა. 20-21 ივნისის ღამეს სპეცრაზმმა აქცია ძალის გადამეტებით დაშალა. შედეგად დაშავდა ასეულობით და დასახიჩრდა ათეულობით ადამიანი. მეორე დღიდან დემონსტრანტები შს მინისტრის პასუხისმგებლობის გადაყენებას ითხოვენ, თუმცა ის გადადგომაზე უარს ამბობს, რასაც მმართველი გუნდიც უჭერს მხარს.