საქართველოს პარლამენტის წინ მიმდინარე საპროტესტო აქცია #სირცხვილია დასრულდა. ორგანიზატორების განცხადებით, ისინი რუსთაველის გამზირზე ხვალ, პირველ ივლისს, 19:00 კვლავ შეიკრიბებიან მოთხოვნით — თანამდებობიდან გადადგეს შს მინისტრი გიორგი გახარია.

აქციის ორგანიზატორების გადაწყვეტილებით, დღეს სცენა მხოლოდ სამოქალაქო საზოგადოებისა და ხელოვნების სფეროს წარმომადგენლებს დაეთმოთ, მათ შორის იყვნენ: ნინო ქათამაძე, ერეკლე დეისაძე, დავით გაბუნია და სხვები.

საქართველოში ანტისაოკუპაციო აქციები #სირცხვილია მე-11 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში, სამედიცინო დაწესებულებაში რჩება.

შედეგად, აქციები ამ დრომდე გრძელდება შინაგან საქმეთა მიინისტრის გიორგი გახარიას გადაგომის მოთხოვნით.