29 ივნისს ეროვნული ბიბლიოთეკის მოძრაობა ეკვილიბრიუმი თეთრიწყაროს მუნიციპალიტეტის სოფელ დიდ თონეთში აღდგენილ ბიბლიოთეკას ესტუმრა.

"სამეგრელოდან დღეს თეთრიწყაროში, სოფელ დიდ თონეთში ჩავედი და ვაჟა-ფშაველას ბიბლიოთეკა გავხსენით. ჩემგან მარჯვნივ რომ ბიჭი დგას, დათია ბადალაშვილი, მან წამოიწყო ეს მნიშვნელოვანი საქმე და სრულიად განადგურებულ ოთახში ახლა ლამაზი სამკითხველოა, რომელიც მალე კიდევ უფრო კომფორტული გახდება. დათია ჩვენი დროის გმირია, მწყემსი ბიჭი, რომელიც ძალიან კარგი მწერალიცაა, ერთ დღეს ინა არჩუაშვილის რჩევით, ამ განზარხვით მესტუმრა და ეროვნული ბიბლიოთეკა მისი იდეის მთავარი მხარდამჭერი გახდა. მერე უამრავი ადამიანი დაგვეხმარა — შვეიცარიის საელჩო, კომპანიები დიო და ევროსტილი, რეგიონული ბიბლიოთეკები და მწერალთა სახლი. გილოცავთ დათია და თონეთელებო", — განაცხადა ეროვნული ბიბლიოთეკის დირექტორმა გიორგი კეკელიძემ.

"სოფელ დიდ თონეთში ბიბლიოთეკა არ არსებობდა საბჭოთა პერიოდის შემდეგ. ძველი ბიბლიოთეკის შენობა დაინგრა. ძირს დაყრილი წიგნები ვიპოვე, სახურავი ჩამოქცეული იყო. შემეცოდა წიგნები და გადავარჩინე. მუნიციპალიტეტმა სხვა შენობა გამოყო, შტატიც დაუშვა. ფონდის ფორმირებასა და ბიბლიოთეკის მოწყობაში გიორგი კეკელიძე დაგვეხმარა. სპონსორები ეროვნულმა ბიბლიოთეკამ მოიძია. დიდი საქმე გაკეთდა. ამ სოფელში ორი წელი ვაჟა-ფშაველა ასწავლიდა და ამ ბიბლიოთეკის აღდგენით, ასე მგონია, მის ნაკვალევზე დავდივართ", — აცხადებს ბიბლიოთეკის ერთადერთი თანამშრომელი დათია ბადალაშვილი.