პარლამენტთან მიმდინარე ანტისაოკუპაციო აქციაზე, გამოსვლების პარალელურად, მელოდიად ქცეული ფრაზა Пу́тін - хуйло́ გაისმა. მუსიკოსმა დათო გაბუნიამ დემონსტრანტებს სიტყვები რამდენჯერმე გაუმეორა, შემდგომ კი ტაშის საშუალებით რიტმიც განსაზღვრა. რამდენიმე წუთის განმავლობაში აქციის მონაწილეები ერთად მღეროდნენ Пу́тін - хуйло́-ს.

ფრაზები რომ, შესაძლოა, სიმღერად იქცეს, ალბათ გასაკვირი არ უნდა იყოს, მაგრამ ყველაფერი უფრო საინტერესო მაშინ ხდება, როცა ამ სიმღერის ისტორიას უკრაინასთან, ოკუპაციასთან და ორი მეზობელი ქვეყნის საერთო სულისკვეთებასთან აქვს კავშირი.

Пу́тін - хуйло́-ს პირველი ვერსია Surkis Khuylo იყო და პირველად, როგორც საფეხბურთო მარში, ხარკოვის კლუბმა მეტალისტმა შეასრულა. ფრაზა ორ უკრაინელ ოლიგარქს შორის დაპირისპირებას უკავშირდებოდა. პირველი ალექსანდრ იაროსლავსკი იყო, ხარკოვის საფეხბურთო კლუბ მეტალისტის მფლობელი, მეორე — გრიგორი სურკისი, შემდგომ უკრაინის ფეხბურთის ფედერაციის პრეზიდენტი. მას მჭიდრო ისტორიული და ოჯახური კონტაქტი ჰქონდა კიევის დინამოსთან. ხარკოვის ფანებმა, რომლებიც მხარს უჭერდნენ თავიანთი კლუბის პრეზიდენტს ალექსანდრ იაროსლავსკის, საკუთარი პროტესტის გამოსახატად ფეხბურთის მატჩებზე სკანდირებდნენ ფრაზას Surkis Khuylo.

Пу́тін - хуйло́, როგორც სიმღერა, 2014 წელს ხარკოვში მიმდინარე მარშზე ადგილობრივმა ფეხბურთის ფანებმა შეასრულეს. ჩანაწერი YouTube-ზე აიტვირთა და მალევე მთელ მსოფლიოში გავრცელდა. ამ ფორმით ფეხბურთის ფანებმა რუსეთის მიერ ყირიმის ანექსია და უკრაინაში რუსული სამხედრო ძალების ჩარევა გააპროტესტეს.

სიმღერამ ქუჩიდან ფეხბურთის მოედანზე გადაინაცვლა არა მხოლოდ ხარკოვის მეტალისტში, არამედ სხვა კლუბებშიც, მათ შორისაა დონეცკის შახტარი, კიევის დინამო და სხვა. უფრო მეტიც, მსოფლიო მედიამ სიმღერას უკრაინის კულტურული მემკვიდრეობა უწოდა.

რამდენიმე უკრაინულმა როკ-ბენდმა ჰიმნის ქავერები და ადაპტირებული ვერსიები შექმნა. მეტალის რემიქსი 2014 წლის 21 აპრილს ბენდმა AstrogentA ჩაწერა.

უკრაინულმა ბენდმა,Teler საერთაშორისო ყურადღება დაიმსახურა სიმღერითა და კლიპით "Putin Hello". სიმღერაში მუსიკოსმა "Khuylo" ინგლისური სიტყვა "Hello"-თი ჩაანაცვლა. ვიდეოში ბენდის წევრებს უკრაინული ფეხბურთის კლუბის ფერებში აცვიათ და სკანდირებენ "Putin Hello", -ს, როგორც სიმღერის რეფრენს.

ჰიმნმა როკ ბენდებში დიდი პოპულარობით ისარგებლა და ბევრი ვარიაცია შეიქმნა Druha Rika-ს, Lemonchiki Project-ისა და Mad Heads-ის მიერ.

გამოცემამ, კიევის პოსტი სიმღერის ცხრა ვერსია და ორი Пу́тін - хуйло́-სთან დაკავშირებული სიმღერა მიმოიხილა.

2014 წლის ოქტომბერში უკრაინაში ვიზიტით მყოფი ბელარუსიელი ფანები შეუერთდნენ უკრაინელ ფეხბურთის ფანებს ჰიმნის შესრულების დროს 2016 წლის ევროპის UEFA-ს საკვალიფიკაციო მატჩზე. შედეგად, 100 უკრაინელი და 30 ბელარუსიელი ფეხბურთის ფანი დააკავეს და დაკითხეს "შეურაცხმყოფელი ლექსიკის" გამოყენების მოტივით. დაკავებული უკრაინელებიდან 7 -მა 5 დღე საკანში გაატარა.

ჰიმნი მალევე გავრცელდა უკრაინის გარეთ და დღემდე დიდი პოპულარობით სარგებლობს იმ ადამიანებს შორის, რომლებიც მხარს უჭერენ უკრაინის ტერიტორიულ მთლიანობას და ზოგადად, ეწინააღმდეგებიან ვლადიმირ პუტინის პოლიტიკას მეზობელ სახელმწიფოებში. ამ სიას, რა თქმა უნდა, საქართველოც შეუერთდა.