ქართული ოცნებიდან წასული დეპუტატი, ეკა ბესელია ამბობს, რომ პარლამენტში განვითარებული მოვლენები არის უპატიებელი შეცდომები და "უპატიებელი პოლიტიკური სიბეცე".

"ის, რომ დღეს არ იცი რომელ სკამზი ვინ უნდა იჯდეს, ქვეყნის მეგობარი თუ მტრულად განწყობილი — არ იცი როგორ უნდა მართო ქვეყანა, არ იცი როგორ უნდა მოექცე საკუთარ სამშობლოს. ეს არის ისეთი ემოციური და მგრძნობიარე საკითხები, რომლებსაც საზოგადოება არავის არ პატიობს. ყველაფერს აქვს თავისი დასაწყისი და დასასურლი, მე ვხედავ, რომ მმართველი პარტია მიდიდასასრულისკენ მიდის", — განაცხადა ეკა ბესელიამ.

დღეს, 20 ივნისს მართლმადიდებლობის საპარლამენტთაშორისო ასამბლეის ფარგლებში რუსი დეპუტატები საქართველოს პარლამენტში მივიდნენ. ასამბლეის წევრი, სერგეი გავრილოვი პარლამენტში, ირაკლი კობახიძის სავარძელში ჩაჯდა და სხდომა წაიყვანა. სწორედ ამ ფაქტმა გამოიწვია ოპოზიციონერი დეპუტატებისა და მოქალაქეების პროტესტი. გუშინ 19 ივნისს პრეზიდენტის ყოფილ სასახლეში სერგეი გავრილოვმა განაცხადა, რომ "2008 წლის ომი ისტორიაა, რომლისგანაც გაკვეთილები უნდა ვისწავლოთ". მანვე აღნიშნა, რომ ეს იყო უსიამოვნება, რომლის "ინიციატორები ახლა საქართველოში არ იმყოფებიან". ამის შესახებ მან რუსთავი 2-თან ისაუბრა.

გავრილოვმა აღნიშნა ისიც, რომ საქართველოსა და რუსეთს შორის ბევრი უსიამოვნება იყო, მაგრამ პრობლემების მოგვარება შესაძლებელია. ასამბლეაზე მან ისაუბრა იმაზე, რომ მსოფლიოს ძალიან ბევრი პრობლემა აქვს და ამ სიტუაციაში ძალის პოზიციიდან საუბარი და სანქციების დაწესება არასწორია. მისი თქმით, მსოფლიო მართლმადიდებლობის ირგვლივ უნდა გაერთიანდეს.

19-22 ივნისს თბილისი მართლმადიდებლობის საპარლამენტთაშორისო ასამბლეას (IAO) მასპინძლობს. 26-ე გენერალური ასამბლეის სესიის თემაა "პარლამენტარიზმის წვლილი თანამედროვე სოციალური და პოლიტიკური მოვლენების გააზრებაში".