"საქმიანი ფორმატის ნაცვლად, ოპოზიციის ერთმა ნაწილმა ფეხების ბაკუნი აირჩია", — ასე გამოეხმაურა ქართული ოცნების დეპუტატი, არჩილ თალაკვაძე ევროპული საქართველოსა და ნაციონალური მოძრაობის წევრის მიერ არჩევნების საკითხზე მომუშავე ჯგუფის პროტესტის ნიშნად დატოვებას.

არჩილ თალაკვაძის თქმით, დღეს ოპოზიცია ისე აჩვენებენ ხალხს თავს, თითქოს პროპორციულ სისტემაზე გადასვლა ყოველთვის ძალიან უნდოდათ.

"იყვნენ ხელისუფლებაში და შეეცვალათ, რა უშლიდათ ხელს? მათგან განსხვავებით, ჩვენ ეს შევცვალეთ ჩვენი ხელისუფლებაში ყოფნის დროს. პირველ სამუშაო შეხვედრაზე გამოჩნდა, რომ ტრადიციულად არ უნდათ პასუხისმგებლობის გაზიარება, თუმცა მერე კი მოსწონთ და იყენებენ ყველა სიკეთეს, რაც ჩვენს გადაწყვეტილებებს მოაქვს. სამწუხაროა, რომ საქმიანი ფორმატის ნაცვლად, ოპოზიციის ერთმა ნაწილმა ფეხების ბაკუნი აირჩია – კიდევ ერთ შეცდომას უშვებენ", — განაცხადა არჩილ თალაკვაძემ.

საქართველოს პარლამენტის ვიცე-სპიკერმა, სერგი კაპანაძემ საარჩევნო თემატიკაზე შექმნილი ჯგუფის დღევანდელი შეხვედრა დატოვა. როგორც ჟურნალისტებს სერგი კაპანაძემ განუცხადა, ევროპული საქართველოს მთავარი მოთხოვნაა, ქვეყანაში პროპორციული სისტემა 2020 წლიდან ამოქმედდეს. მისი თქმით, "არ შეიძლება, დიდი საკითხები პატარა საკითხების მძევალი იყოს".

სერგი კაპანაძესთან ერთად შეხვედრას პროტესტი გამოუცხადა ნაციონალური მოძრაობის დეპუტატმა თინა ბოკუჩავამ. მისი მთავარი მოთხოვნაც, 2020 წლიდან პროპორციულ სისტემაზე გადასვლაა. მისივე თქმით, თუ ხელისუფლება გადაწყვეტს, რომ ჯიუტად თავი აარიდოს აღნიშნული რეფორმის განხორციელებას, შესაძლებელია, მისი გუნდის მხრიდან ამ ფორმატში მონაწილეობამ აზრი დაკარგოს.

საარჩევნო კოდექსში შესატან ცვლილებებზე შეხვედრის პარალელურად 20-მა პოლიტიკურმა პარტიამ პარლამენტში 300 000-ზე მეტი ხელმოწერა მიიტანა და სკაონსტიტუციო ცვლილება მოითხოვა, რომლის მიხედვითაც მაჟორიტარული სისტემა უნდ გაუქმდეს.