ვაკის პარკის წინა საპროექტო სამუშაოებზე კონკურსი გამოცხადდა. ამის შესახებ დედაქალაქის მთავრობის სხდომაზე, თბილისის მერმა კახა კალაძემ განაცხადა. მისი თქმით, საპროექტო წინადადებების მიღება 14 ივნისს დასრულდება და შემდგომ, რეაბილიტაცია დაიწყება.

"ამ წინასაპროექტო კვლევით უნდა დადგინდეს ფუნქციური ზონირება. ასევე, უნდა შემუშავდეს დენდროლოგიის საპროექტო დოკუმენტაცია. სარეაბილიტაციო სამუშაოები უკვე მეორე ეტაპია. ვაკის პარკს აქვს კულტურული მემკვიდრეობის სტატუსი და ჩარევას ვერ განვახორციელეთ, თუმცა გარკვეულ მოწესრიგებას საჭიროებს, რომ ყველასთვის იყოს სასურველი", — განაცხადა კახა კალაძემ.

მისი თქმით, მოწესრიგდება ვაკის პარკში არსებული კასკადი. პროექტით, უნდა აღდგეს ქვის საფარი, მოწესრიგდეს კიბეები, კიბეების გასწვრივ მოეწყოს მწვანე საფარი, მოაჯირები და ღამის განათება. ასევე იგეგმება კასკადისა და შადრევნების მუსიკალური გახმოვანების სისტემის დამონტაჟება.

"კასკადის ზედა წერტილში უნდა მოეწყოს გადმოსახედი მოედანი და საფეხმავლო ბილიკი კუს ტბამდე. კასკადის მუშაობისთვის არსებული სატუმბო სისტემა ჩანაცვლდება და ახალი, თანამედროვე სადგური განთავსდება", — განაცხადა კალაძემ.

მისივე თქმით, კასკადის რეაბილიტაციის პროექტზე წინადადებების მიღება 19 ივნისს სრულდება და პროექტის ღირებულება 320 000 ლარია.