გურჯაანის რაიონულმა სასამართლომ 16 წლის გოგონას გაუპატიურებაში ბრალდებულ 40 წლის მამაკაცს აღკვეთის ღონისძიებად პატიმრობა შეუფარდა. რუსთავი 2-ის ინფორმაციით, სასამართლოს დაზარალებული მხარე არ ესწრებოდა, ბრალდებულის ადვოკატი ამ გადაწყვეტილებას არ ეთანხმება.

საქმე ეხება ლაგოდეხში მე-11 კლასის მოსწავლეს, რომელიც გაუპატიურებაში 40 წლის ნათესავს ადანაშაულებს. ამის შესახებ ინფორმაცია რეგინფომ გაავრცელა. გამოცემის ინფორმაციით, სავარაუდო მოძალადე ბრალდებას უარყოფდა და გოგოს თავის 14 წლის შვილზე ქორწინებას სთავაზობდა. არასრულწლოვანმა ორსულობის შესახებ მხოლოდ მას შემდეგ გაიგო, რაც გაკვეთილზე შეუძლოდ გახდა და საავადმყოფოში გადაიყვანეს.

გაუპატიურების შედეგად გოგომ ბავშვი გააჩინა. ექსპერტიზის დასკვნის თანახმად, ბრალდებული ახალდაბადებული ბავშვის მამაა. შემთხვევა 2018 წლის სექტემბერში მოხდა.

ბრალდებული გუშინ, 10 ივნისს დააკავეს. გამოძიება სისხლის სამართლის კოდექსის 137-ე მუხლის მე-3 ნაწილის "დ" ქვეპუნქტით მიმდინარეობს, რაც არასრულწლოვნის მიმართ წინასწარი შეცნობით გაუპატიურებას გულისხმობს. დანაშაული 10-13 წლამდე ვადით თავისუფლების აღკვეთას ითვალისწინებს.