ეკონომიკის მინისტრმა ნათია თურნავამ თქვა, რომ კონკურენციის მიზნით, მხოლოდ მცირედი დოზით კერძო სექტორში არის დაშვებული რუსული გაზი. ამის შესახებ მან დღეს, 7 ივნისს დარგობრივი ეკონომიკის სხდომაზე ოპოზიციის კითხვების საპასუხოდ თქვა.

"ჩვენ ყველა სექტორში შემოგვაქვს კონკურენცია, ეხება ეს ელექტროენერგიას თუ გაზს. საუბარია, როგორც შიგნით კონკურენციაზე, რომ ქსელური საქმიანობა, გატარებისა და მიწოდების საქმიანობა უნდა იყოს გამიჯნული, რათა მომხმარებელი იყოს გაცილებით მეტად დაცული. რასაკვირველია, ეს პრინციპები გარე მიწოდებაზეც ვრცელდება. ეს მოცემულობა შეესაბამება ევროპულ სტანდარტს, რომელსაც ენერგეტიკაში ვამკვიდრებთ. კონკურენცია არის კარგი, მით უფრო, თუ ეს არ აზარალებს ჩვენს გეოპოლიტიკურ ინტერესებს", — განაცხადა ნათია თურნავამ.

ევროპული საქართველოს წევრის, გიგა ბოკერიას კითხვაზე, როგორ შეაფასებდა მინისტრი არსებულ ხელშეკრულებას გაზპრომთან, თურნავამ აღნიშნა, რომ გაზის ნატურით გადასახადი, მონეტარულ ფორმას ჯობდა: "უფრო მიმზიდველი იყო". მინისტრის თქმით, საქართველოს არ ჰქონდა შანსი შეენარჩუნებინა ძველი ხელშეკრულება:

"გაზპრომი მთლიანად გადავიდა მონეტარულ ფორმაზე ყველა სახელმწიფოზე. რატომ უნდა გვქონოდა რომელიმე პოლიტიკოსს ან პოლიტიკურ ძალას მოლოდინი, რომ ჩვენ, როდესაც ქვეყნის ტერიტორიის დიდი ნაწილი ოკუპირებული გვაქვს, რატომღაც ჩვენთვის დაუშვებდა გაზპრომი გამონაკლისს".

ბოკერიას დამაზუსტებელ კითხვაზე, თუ რა მოხდებოდა საქართველო რომ არ დათანხმებოდა განახლებულ კონტრაქტს, ეკონომიკის მინისტრმა უპასუხა, რომ ეს სულ მცირე ორი მიმართულებით გამოიწვევდა სირთულეებს, მათ შორის, ძალიან რთულ ვითარებას შეუქმნიდა სომხეთს.

ბოკერიას კითხვაზე, შეწყვეტდა თუ არა გაზის მიწოდებს რუსეთი, თურნავა პასუხობს: "მათ შორის, შეიძლება შეწყვეტილიყო კიდეც". მინისტრი ამატებს, რომ ტექნიკური პრობლემა შეექმნებოდა საქართველოსაც:

"ბალანსისთვის რუსული გაზის გარკვეული რაოდენობა გამოიყენებოდა ყოველთვის. საქართველო შეიძლება ამ კუთხით აღმოჩენილიყო რთულ მდგომარეობაში".

2017 წლის იანვარში მაშინდელმა ენერგეტიკის მინისტრმა კახა კალაძემ განაცხადა, რომ გაზპრომთან გადახდის ფორმა ნედლეულის ნაცვლად, ფულადი ანაზღაურებით შეიცვლება. კალაძემ ამას "ოპტიმალური წინადედების მიღება" უწოდა. მისივე განმარტებით, ამით საქართველოს დამოკიდებულება რუსეთის ენერგომატარებლებზე არ გაიზრდება.

კალაძის თქმით, საქართველოსთვის გადასახდელი ტრანზიტის საფასური, იქნება ერთ-ერთი ყველაზე მაღალი ევროპის ქვეყნებს შორის.

ხელშეკრულება გააპროტესტა ოპოზიციამ. საპარლამენტო უმცირესობაში აცხადებდნენ, რომ გატარებული გაზის სანაცვლოდ ფულადი სარგებლის მიღება საქართველოს რუსეთზე დამოკიდებულს გახდის.