აუდიტორია 115-ის წევრი, ნათია ქარჩილაძე ამბობს, რომ თსუ-ს სხვადასხვა რექტორი ყოველ წელს გამოდის და დამსწრე სტუდენტებს ატყუებს, რომ ისინი ნომერ პირველ უნივერსიტეტში სწავლობენ და უნივერსიტეტში პრობლემები არ არის:

"თუმცა ჩვენ დღეს მათ, როგორც ყოველ წელს, არ მივეცით სტუდენტების მოტყუების საშუალება და წავუკითხეთ მას ჩვენი მანიფესტი, სადაც ვითხოვთ, რომ დაინერგოს გარე რეფერირება, ხარისხიანი და ხელმისაწვდომი განათლება, თვითმმართველობის არსებული სტრუქტურის რეფორმირება და საერთო საცხოვრებლის გარემონტება. გარდა ამისა, მას პირდაპირი მოთხოვნაც წავუყენეთ: უნივერსიტეტის სტუდენტები, რომლებსაც არ აქვთ საშუალება გადაიხადონ სწავლის გადასახადი, არ აძლევენ აკადემიური რეგისტრაციის გავლის საშუალებას. ამის მოგვარება რექტორს ერთი ხელმოწერით შეუძლია. თუმცა ის ამას არ აკეთებს".

დღეს საზეიმო მიღება, რომელსაც მინისტრები, თბილისის მერი და თსუ-ს ხელმძღვანელები პირველკურსელთათვის თბილისის სახელმწიფო უნივერსიტეტში მართავდნენ, აუდიტორია 115-მა ჩაშალა.

აღნიშნულის გამო, პირველკურსელებისთვის დაგეგმილი ღონისძიება სააქტო დარბაზში გაგრძელდება. აუდიტორია 115-ის წევრები ცდილობენ აღნიშნულ დარბაზში შესვლას, თუმცა მათ იქ არ უშვებენ.