ევროპული საქართველოს დეპუტატმა აკაკი ბობოხიძემ პლენარულ სხდომაზე სექსისტური განცხადება გააკეთა. მან ქართულ ოცნებასა და ევროპულ საქართველოს შორის დებატები "ორი კახპა, ბოზი ქალის ურთიერთობას" შეადარა. სხდომის წამყვანმა, თამარ ჩუგოშვილმა ბობოხიძეს ეთიკური განცხადებების გაკეთებისკენ მოუწოდა.

აკაკი ბობოხიძე პლენარულ სხდომაზე ქართული ოცნების იმ დეპუტატებს გამოეხმაურა, რომლებმაც მთაწმინდის მაჟორიტარობის კანდიდატი შალვა შავგულიძე ევროპულ საქართველოსთან კოალიციაში დაადანაშაულა.

"ფანტომის ეფექტია მედიცინაში ცნობილი, როცა ადამიანი კიდევ დიდხანს გრძნობს მოკვეთილ კიდურს და აწუხებს. სამწუხაროდ, ფანტომის დონეზეც კი არ შეგრჩათ ნამუსი. როგორც ჩანს, ეს კიდური არასდროს არ გქონიათ, სხვა ვერანაირი დასკვნა ვერ გამომაქვს, როცა ვუსმენ ბატონ ზვიად ძიძიგურს, დავით მათიკაშვილს, კარლო კოპალიანს. ზვიად ძიძიგურის გამოსვლამ გამახსენა იგავ-არაკი, რომელსაც ბავშვობაში ვსწავლობდით, მგლისა და კრავის, როდესაც მდინარის პირზე მაღლა მდგომი მგელი, დაბლა მდგომ კრავს აბრალებდა წყლის ამღვრევას", — განაცხადა აკაკი ბობოხიძემ.

მისი თქმით, არჩევნებში დაძაბულობის მაპროვოცირებლები თავად ქართული ოცნების დეპუტატები იყვნენ.

"ორი კახპა, ბოზი ქალის ურთიერთობას მაგონებს ჩვენი ერთმანეთის ლანძღვა, ამ დროს საქართველო იჭყლიტება", — განაცხადა აკაკი ბობოხიძემ.

მან ქართული ოცნების კარლო კოპალიანიც გააკრიტიკა და თქვა, რომ წინა მოწვევის პარლამენტში უმრავლესობა ნაციონალური მოძრაობის ფრაქციიდან გასულ დეპუტატებთან კოალიციის ჩამოაყალიბა.

"გამიკვირდა 26 მაისზე რომ დაიწყეთ ლაპარაკი იმიტომ, რომ მეგონა დამოუკიდებლობის დღესთან დაკავშირებით დაიწყებდით საუბარს. გაოცებული ვიყავი და ყოჩაღ-თქო, მაგრამ მერე დაუბრუნდით თქვენს ჩვეულ ფორმას. ბატონ ძიძიგურს მაინც მოუსმინეთ, რომ ძალადობით არ შეიძლება ხელისუფლების შეცვლა? კარგად მახსოვს იმ 26 მაისს, როგორ იყავით, სახალხო პატრული რომ გქონდათ, ფარები, კეტები და ძალადობაზე რომ ლაპარაკობდით. იმიტომაც შეიძლება არაადეკვატური, მაგრამ ის პასუხი მიიღეთ სახელმწიფოსგან, რაც მიიღეთ, ოღონდ გამომწვევი თქვენ იყავით, ბატონებო", — განაცხადა ბობოხიძემ.

აკაკი ბობოხიძის განცხადებას დეპუტატებს შორის სიტყვიერი დაპირისპირება მოჰყვა, რის შემდეგაც ევროპული საქართველოს დეპუტატებმა პლენარულ სხდომათა დარბაზი დატოვეს.