სამეგრელოს სოფელ კოკში #97-ე საარჩევნო უბანზე ფიზიკური და სიტყვიერი დაპირისპირება მოხდა. ერთიანი ნაციონალური მოძრაობის, თბილისის საკრებულოს დეპუტატის, ლევან ხაბეიშვილის თქმით, შელაპარაკება მას შემდეგ დაიწყო, რაც საარჩევნო კომისიის თავმჯდომარემ საჩივარი შეცდომით დაწერა და მათი დამკვირვებელი გამოაძევა.

რუსთავი 2-ის ინფორმაციით, ადგილზე მობილიზებული იყო პოლიცია, რომელმაც ქართული ოცნების აქტივისტი ადგილიდან გადაიყვანა, რასაც გარეთ შეკრებილ მოქალაქეებს შორის დაპირისპირება მოჰყვა.

შინაგან საქმეთა საიმინისტროს ინფორმაციით, კოკში ადმინისტრაციული წესით დააკავეს ერთი პირი, 166-ე და 173-ე მუხლებით, რაც პოლიციის კანონიერი მოთხოვნის დაუმორჩილებლობას და წვრილმან ხულიგნობას გულისხმობს.

ქართული ოცნების დეპუტატის ირაკლი ზარქუას თქმით, "სადაც მშვიდად მიმდინარეობდა არჩევნები ჩვენს უბანში [ეს არის კოკის, ხურჩას და ორსანტიას მიმართულებით], ნაციონალური მოძრაობა როგორც კი გამოჩნდა, დაიწყო ძალადობა, დაიწყო პროვოკაცია".

საარჩევნო უბნიდან გამოძევებული ერთ-ერთი დამკვირვებელი რუსთავი 2-თან კომენტარში ამბობს, რომ მანამდე უნდა გაეძევებინათ დამკვირვებელი ლაშა ნანიაშვილი, კომისიის თავმჯდომარემ შეცდომით დაწერა ოქმი, რაზეც მან ახსნა-განმარტებაც დააწერინა, თუმცა უბნიდან მაინც გამოაძევეს.

სოფელ კოკის #97-ე უბნიდან გაერთიანებული ოპოზიციის 4 დამკვირვებელია გამოძევებული.