გაერთიანებული ოპოზიციის წევრი, ლევან ბეჟაშვილი აცხადებს, რომ მათი მხარდამჭერები ზუგდიდის მასშტაბით მდებარე საარჩევნო უბნებს განსაკუთრებულ რეჟიმში დააკვირდებიან. მისი ცნობით, უბნებზე მობილიზებული იქნება კამერები და დრონები.

"117 უბანზე დაახლოებით 300 ვიდეო იქნება მობილიზებული, თითოეული საარჩევნო უბნიდან პირდაპირი ტრანსლირება მოხდება საარჩევნო პროცესის მიმდინარეობის, როგორც საარჩევნო უბანზე, ისე მის გარეთ. რაც ყველაზე ნოუ ჰაუ არის — საარჩევნო უბნებთან მობილიზებული იქნებიან დრონები, რომლებიც გააკონტროლებენ მთელი დღის განმავლობაში საარჩევნო პროცესის მინდინარეობას საარჩევნო უბნის გარეთ", — თქვა ბეჟაშვილმა.

ქართული ოცნების ზუგდიდის ოფისში შტაბის ხელმძღვანელმა, ირაკლი ჩიქოვანმა საარჩევნო პროცესთან დაკავშირებით ბრიფინგი გამართა. მისი თქმით, არჩევნების ჩაშლის მიზნით ოპოზიცია 3 000 აგრესიული პირის ჩანერგვას გეგმავს.