სახალხო დამცველი ნინო ლომჯარია გმობს ზუგდიდის მუნიციპალიტეტის საკრებულოს თავმჯდომარის მოადგილის თამაზ ფაცაციას მიერ ფეისბუქზე გამოქვეყნებულ დისკრიმინაციულ განცხადებებს პოლიტიკოსი ქალების — თინა ბოკუჩავასა და ანა წითლიძის მისამართით.

ომბუდსმენი მიიჩნევს, რომ თამაზ ფაცაციას გამონათქვამები სექსისტური შინაარსისაა, ვინაიდან აქვს სექსუალური კონოტაცია, მიზნად ისახავს პოლიტიკოსი ქალების შეურაცხყოფას, დამცირებასა და მათ უქმნის არაჯანსაღ, უთანასწორო პოლიტიკურ გარემოს.

დღეს, 16 მაისს ზუგდიდის საკრებულოს თავმჯდომარის მოადგილემ, თაზო ფაცაციამ ნაციონალური მოძრაობის დეპუტატი თინათინ ბოკუჩავა სექსისტურ და შეურაცხმყოფელ კონტექსტში მოიხსენია. ფაცაციამ On.ge-სთან საუბარში განაცხადა, რომ პოსტში სექსი არ უხსენებია და შესაბამისად, მისი განცხადება სექსისტური ვერ იქნება. მანვე აღნიშნა, რომ კარგ ოჯახშია გაზრდილი და იცის ადამიანებთან როგორ იურთიერთოს.

გუშინ, 15 მაისს მან ნაციონალური მოძრაობის კიდევ ერთი წევრი ანი წითლიძე მოიხსენია სექსისტურად. ფაცაცია წითლიძეს ალქაჯს ადარებს და წერს, რომ ქალი პოლიტიკოსი მასზე "გიჟდება", "უყვარს" და "ჭკუა ეკეტება".