შინაგან საქმეთა სამინისტრომ ნარკოტიკების ინტერნეტით რეალიზაციის საქმეზე ყაზახეთის მოქალაქე დააკავა. მას ბრალი ნარკოტიკების შეძენა-შენახვისთვის წაუყენეს.

უწყების ინფორმაციით, ბათუმში, სამალავებში ნარკოტიკულ საშუალებებს ათავსებდა და აღნიშნული სამალავების მისამართებს ნარკოტიკების შეძენის მსურველ პირებს ატყობინებდა, რაშიც თანხას დისტანციური არხებით იღებდა. გამოძიების მტკიცებით, დაკავებულის პირადი და დროებითი საცხოვრებელი სახლის ჩხრეკისას პოლიციამ 34 შეკვრად დაფასოებული სინთეტიკური ნარკოტიკული საშუალება, 326 აშშ დოლარი, მწებავი ლენტები და მცირე ზომის 2 სასწორი ამოიღეს. მათივე მტკიცებით, ბრალდებულის პირადი ჩხრეკისას ამოღებული მობილური ტელეფონიდან მიღებული ინფორმაციის საფუძველზე, ბათუმში, ათეულობით მისამართიდან, სარეალიზაციოდ გამზადებული ნარკოტიკული საშუალებები ამოიღეს, რომლებზეც ექსპერტიზებია დანიშნული.

გამოძიება ნარკოტიკული საშუალების უკანონო შეძენა-შენახვის ფაქტზე, საქართველოს სსკ-ს 260-ე მუხლის 1-ლი ნაწილით მიმდინარეობს. აღნიშნული მუხლი ექვს წლამდე თავისუფლების აღკვეთას ითვალისწინებს.