მთავრობა ცივ იარაღზე რეგულაციების გამკაცრებას გეგმავს. შესაბამისი საკანონმდებლო ცვლილება მთავრობას დღეს წარედგინა. ამის შესახებ პრემიერ-მინისტრმა, მამუკა ბახტაძემ მთავრობის სხდომის დაწყებამდე განაცხადა.

ბახტაძე ამბობს, რომ რეგულაცია ითვალისწინებს ახალი პრაქტიკის დანერგვას, რომელიც ცივი იარაღის უკანონო ბრუნვასთან დაკავშირებულ რისკებს დააზღვევს. მისივე თქმით, რეგულაციების შემუშავებისას მთავრობა ევროპული ქვეყნების გამოცდილებას დაეყრდნო.

"საუბარია არა მხოლოდ დანაშაულზე რეაქციის გამკაცრებაზე, არამედ პრევენციაზე, ცივი იარაღის უკონტროლო ბრუნვის აღკვეთაზე... საქართველოში დღეს არსებული რეგულაციით, ცივი იარაღით ვაჭრობა შეუძლია ნებისმიერ პირს, ნებისმიერ ადგილას, მათ შორის სკოლების მიმდებარე ტერიტორიაზე და ეს ხდება ფაქტობრივად, ყოველგვარი სტანდარტის დაცვის გარეშე. ეს მიუღებელია", — თქვა ბახტაძემ.