სახელმწიფო უსაფრთხოების სამსახურის უფროსის ყოფილი პირველი მოადგილე სოსო გოგაშვილი ითხოვს, რომ დაკითხონ იმ სპეცოპერაციის საქმეზე, რომლის დროსაც თემირლან მაჩალიკაშვილის დაიჭრა. ამის შესახებ მან ინტერპრესნიუსს განუცხადა.

"დამკითხონ, ვიყავი თუ არა ჩასული პანკისის ხეობაში. იმ დროს, თბილისში ვიყავი, ისევე როგორც, ყველა ხელმძღვანელი. ჩემთან ერთად იყვნენ სტუმრები, ამის დადგენა მარტივად შეიძლება, მათ შორის, სატელეფონო ანძებით და სხვა ტექნიკური საშუალებებით. ასევე გამოსაკითხია გამომძიებლები, დაკავების ჯგუფი, მე ვხელმძღვანელობდი თუ არა ამ ღონისძიებას", — აცხადებს გოგაშვილი.

სუს-ის მაღალჩინოსნის მტკიცებით, თემირლან მაჩალიკაშვილის ლიკვიდაცია დაგეგმილი არ იყო და ის აყვანის პერიოდში დაიჭრა, ჭრილობა კი სასიკვდილო აღმოჩნდა.

გოგაშვილის თქმით, მას აბრალებენ სპეცოპერაციის ხელმძღვანელობას. მისივე თქმით, სპეცოპერაციასთან არანაირი შეხება არ ჰქონია და ცილისწამება მისთვის მძიმე მოსასმენია.

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა. რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო.