ნაციონალური მოძრაობის მხარდამჭერი, ხათუნა ბერიძე ამბობს, რომ პარლამენტარი, ანზორ ბოლქვაძე პოლიტიკური ნიშნით საკუთარი სასტუმროდან აგდებდა. ანზორ ბოლქვაძე ქართული ოცნების დეპუტატია და პარლამენტში მაჟორიტარული სიით შევიდა. On.ge-სთან ბერიძე ყვება, რომ მისი პოლიტიკური შეხედულებები სასტუმროს ხელმძღვანელობას არ მოეწონა. შემთხვევა ხულოს სასტუმროში 7 მაისს მოხდა.

ხათუნა ბერიძის თქმით, მის ნომერში მაშინ შევიდნენ, როდესაც ის ოთახში არ იყო და თვითონ ანზორ ბოლქვაძე მოითხოვდა მისგან, რომ სასტუმრო დაეტოვებინა:

"ჩემს ნომერში უკანონოდ შევიდნენ. სტუმარი იყო შიგნით, რომ მოვედი დამხვდა ჩემი ნივთები შეკრებილი და სტუმარი ტოვებდა ნომერს. რომ მოვითხოვე რის საფუძველზე მატოვებინებენ სასტუმროს, მითხრეს, რომ ეს არის კერძო საკუთრება და ფულს დამიბრუნებენ".

ხათუნა ბერიძემ ფეისბუქზე ვიდეო გაავრცელა, სადაც ჩანს, როგორ მოითხოვენ სასტუმროს ადმინისტრაციის წარმომადგენლები, რომ მან ნომერი დატოვოს. ბერიძე უმტკიცებდა, რომ ნომერი მან იქირავა და მისი გაგდების უფლება არ აქვთ. ვიდეოში ჩანს, რომ სასტუმროს წარმომადგენლები პოლიციის გამოძახებითაც იმუქრებიან და ამბობენ, რომ სასტუმრო ქალმა მისივე უსაფრთხოებისთვის უნდა დატოვოს, თუმცა კონკრეტულად რას გულისხმობენ არ აზუსტებენ.

ვიდეოში ისმის როგორ ეუბნება ანზორ ბოლქვაძე ბერიძეს: "თავისუფალი ბრძანდებით, ეს ჩემი საკუთრებაა და გახვალთ აქედან, წადით, მედავეთ".

ხათუნა ბერიძე ამბობს, რომ მისი პოლიტიკური შეხედულებების შესახებ ერთ-ერთი შეკრების დროს გაიგეს, რომელსაც თვითონაც ესწრებოდა:

"ფორმები გადასცეს მეხანძრეებს. ნომერი მანამდე ვიქირავე და რადგანაც ვნახე რომ ღონისძიებაა იყო, ჩავედი. ვნახე, რომ მთავრობის წარმომადგენლები იყვნენ მოსულები. ჩემმა მეგობარმა, რომელიც ნაციონალური მოძრაობის წარმომადგენელია, რაღაც კითხვა დაუსვა თორნიკე რიჟვაძეს და ანზორ ბოლქვაძეს. მე არანაირ საუბარში არ ჩავრეულვარ", — ყვება ხათუნა ბერიძე.

დეპუტატი ანზორ ბოლქვაძე ხათუნა ბერიძის ბრალდებებს უარყოფს. On.ge-ს მან განუცხადა, რომ ქალი ყველას ფოტოებსა და ვიდეოებს უღებდა, რის გამოც სხვა ადამიანებს დისკომფორტს უქმნიდა.

"კაცი ზის, ისვენებს, უღებს ვიდეოს. რა ხდება, ამ კაცმა რა დააშავა? მეკითხებიან ვინ არის, შემოგზავნილია, დასაპატიმრებელია, რა ხდება? რატომ იღებს ამ ვიდეოს. უხერხულია. ჩამოდით, ნახეთ, კარგად და ლამაზად ცხოვრობს", — განაცხადა ანზორ ბოლქვაძე.

ინციდენტის შემდეგ ხათუნა ბერიძე ამბობს, რომ სასტუმროს დატოვება მისთვის აღარავის მოუთხოვია. მისივე თქმით, დაპირისპირებამ სასტუმროს ეზოში გადაინაცვლა, რადგან მის მხარდასაჭერად სასტუმროსთან სხვა ადამიანები მივიდნენ. გარდა ამისა, ის ამბობს, რომ მის მამიდაშვილს დაზიანებები აღმოაჩნდა, რის გამოც პოლიცია გამოიძახა.

შინაგან საქმეთა სამინისტრომ აღნიშნულ საქმეზე გამოძიება სისხლის სამართლის კოდექსის 150-ე მუხლით დაიწყო, რაც იძულებას გულისხმობს.