სახალხო დამცველი, უჩა ნანუაშვილი აცხადებს, რომ მზად არის დემურ სტურუას თვითმკვლელობამდე მიყვანაში ბრალდებულს, გოდერძი თევზაძეს, უახლოეს დღეებში შეხვდეს:

"მე უახლოესი დღეების განმავლობაში, სავარაუდოდ, მოვახერხებ მასთან შეხვედრას. მეც მაინტერესებს და მისგან მინდა გარკვეული ინფორმაციის მიღება. ჩვენ ვითხოვდით და ვითხოვთ საქმის გამოძიებას, რომელიც თვითმკვლელობამდე მიყვანას გულისხმობს და ამაზე, რა თქმა უნდა, დაწყებულია გამოძიება. კონკრეტულად, ვისი პასუხისმგებლობა და ბრალეულობა გამოიკვეთება, რა თქმა უნდა, ეს გამოძიების საგანია".

გოდერძი თევზაძე უკვე მეცხრე დღეა შიმშილობს და ამბობს, რომ უდანაშაულოა. ის ითხოვს სახალხო დამცველის აპარატის წარმომადგენლებთან, ადამიანის უფლებათა კომიტეტის თავჯდომარესთან ან მისი კომიტეტის რომელიმე წარმომადგენელთან შეხვედრას.

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა.

სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ჩადენაში ბრალდებული, ძებნაში მყოფი გოდერძი თევზაძე 13 სექტემბერს ნებაყოფლობით გამოცხადდა საგამოძიებო ორგანოში.

მისი სასამართლო სხდომა 15 სექტემბერს გაიმართა და მოსამართლემ ის წინასწარ პატიმრობაში დატოვა.