თბილისის მერიამ უკვე დაიწყო დედაქალაქის საახალწლო მორთვაზე ზრუნვა, ტენდერი გამოცხადებულია და წინადადებების მიღებაც რამდენიმე დღის წინ დაიწყო.

როგორც დოკუმენტებიდან ირკვევა, საახალწლო მორთულობის განახლებისთვის თბილისის ბიუჯეტიდან მილიონ ლარამდე გამოიყოფა, თუმცა ეს არ არის საბოლოო თანხა. მისი ზუსტი ოდენობა ხელშეკრულებების ხელმოწერის შემდეგ გაირკვევა.

სექტემბერში გამოცხადებული ტენდერების მიხედვით, მერია გეგმავს, რომ დაახლოებით 890 ათას ლარად საახალწლოდ ქუჩების მოსართავად შეიძინოს შემდეგი სახის აქსესუარები:

  • გირლანდა თბილი, ყვითელი ნათებით - 8 000 ცალი;
  • სტრინგი თეთრი, ყინულოვანი ნათებით - 8 566 ცალი;
  • მანათობელი მრგვალი მილი თეთრი, ყინულოვანი ნათებით - 300 ცალი;
  • მანათობელი ფარდა - 7 ცალი;
  • სტრინგი ვერტიკალური ფერადი - 500 ცალი;
  • ლოლოს ფარდა - 50 ცალი;
  • ლედ მანათობელი მილი ნეონური ნათებით - 3 ცალი;

გარდა აღნიშნული დეკორატიული მოსართავებისა, თბილისის მერია აპირებს, რომ იყიდოს 1,8 მეტრიდან 3,6 მეტრამდე სიმაღლის 174 ცალი დეკორატიული, თეთრად შეღებილი ნაძვი, ასევე თეთრად შეღებილი, მანათობელი ბურთი, სულ 53 ერთეული. აღნიშნული ნივთების შესაძენად, ტენდერის მიხედვით, გათვალისწინებულია საშუალოდ 60 845 ლარის გამოყოფა.

დედაქალაქის მერიას ცალკე აქვს ტენდერი გამოცხადებული სტრინგების დასამაგრებლად დეკორატიულ ბურთებსა და ნაძვებზე. ეს კი, საშუალოდ, 21 ათასი ლარის ფარგლებში დაჯდება. ჯამში, მერია დაახლოებით 971 845 ლარს დახარჯავს ახალი დეკორაციებისთვის.