შინაგან საქმეთა სამინისტროს ინფორმაციით, თბილისში ორ არასრულწლოვან შვილზე ძალადობის ბრალდებით უცხო ქვეყნის მოქალაქე დააკავეს. ბავშვები სოციალურმა მუშაკებმა მცირე საოჯახო ტიპის სახლში გადაიყვანეს.

უწყების ინფორმაციით, ბრალდებულმა 30 აპრილს პოლიციას სახლიდან გაქცეული არასრულწლოვანი შვილების მოძებნაში დახმარების თხოვნით მიმართა. შსს-ს ცნობით, იმავე დღეს პოლიციას კაცის არასრულწლოვანმა შვილებმაც მიმართეს და განაცხადეს, რომ მამა მათზე ფიზიკურად და ფსიქოლოგიურად სისტემატურად ძალადობდა.

საქმეზე გამოძიება სისხლის სამარტლის კოდექსის 126¹ მუხლის მეორე ნაწილის "ა" და "გ" ქვეპუნქტებით მიმდინარეობს, რაც წინასწარი შეცნობით ორი ან მეტი არასრულწლოვნის მიმართ ჩადენილ ოჯახში ძალადობას გულისხმობს. ამ მუხლით გათვალისწინებულია პატიმრობა სამ წლამდე.