დირექტორის თანამდებობიდან ნათია კაპანაძის იმპიჩმენტიდან ერთი კვირის შემდეგ აჭარის ტელევიზიის მრჩეველთა საბჭომ დირექტორის თანამდებობაზე ვაკანსია გამოაცხადა. შესაბამისი ოქმი 25 აპრილით თარიღდება.

დოკუმენტის გასაჩივრება დაინტერესებულ პირებს ერთი თვის ვადაში შეუძლიათ, სწორედ ამ დრომდე (24 მაისამდე) შეუძლიათ მსურველებს განაცხადის შევსება.

დეტალები კონკურსის შესახებ

  • სამუშაოს ადგილი: ქალაქი ბათუმი;
  • განაცხადი მიიღება: ბათუმი, მემედ აბაშიძის ქუჩა #41, სამუშაო დღის 10 საათიდან 18
    საათამდე, ან ელექტრონულ მისამართზე [email protected];
  • საქმიანობის დაწყების თარიღი: დანიშვნის მომენტიდან;
  • საქმიანობის ვადა: 3 წელი;
  • კონკურსში მონაწილეობის უფლებით სარგებლობს: საქართველოს მოქალაქე; საზოგადოებრივი აღიარებისა და ნდობის მქონე პირი; მას უნდა ჰქონდეს მაგისტრის ან მასთან გათანაბრებული აკადემიური ხარისხი; არანაკლებ 10 წლის მუშაობის გამოცდილების, მათ შორის ხელმძღვანელ თანამდებობაზე მუშაობის სულ ცოტა 3 წლის და ჟურნალისტიკის, ადამიანის უფლებათა დაცვის ან/და სამეცნიერო-პედაგოგიურ სფეროში მუშაობის არანაკლებ 5-წლიანი მუშაობის გამოცდილება;
  • წარსადგენი დოკუმენტაციის ჩამონათვალი: განცხადება; პირადობის მოწმობის, პასპორტის ან ID ბარათის ასლი; მაგისტრის ანდა მასთან გათანაბრებული აკადემიური ხარისხის დამადასტურებელი დოკუმენტი; სამუშაო გამოცდილების დამადასტურებელი დოკუმენტ(ებ)ის ოფიციალურად დამოწმებული ასლ(ებ)ი;
  • თანამდებობრივი სარგო (შრომის ანაზღაურება): 3 300 ლარი;
  • კონკურსის ეტაპები: განცხადების გადარჩევა და გასაუბრება;
  • გადაწყვეტილების მიღების ვადა: არა უგვიანეს 2019 წლის 4 ივნისი.

19 აპრილს აჭარის ტელევიზიის გენერალურ დირექტორს, ნათია კაპანაძეს მრჩეველთა საბჭომ იმპიჩმენტი გამოუცხადა. მომხრე ოთხი მრჩეველი იყო, წინააღმდეგი — ერთი. კაპანაძე გადაწყვეტილებას სასამართლოში გაასაჩივრებს.