კალიფორნიის სასამართლომ ცოლ-ქმარს, დევიდ და ლუიზა ტურპინებს, რომელთაც 13 შვილი წლების განმავლობაში გამოკეტილი ჰყავდათ, სამუდამო პატიმრობა მიუსაჯეს. ვადამდე ადრე გათავისუფლების მოთხოვნა მათ 25 წლის შემდეგ შეუძლიათ.

თებერვალში სასამართლომ ტურპინები წამებაში, სასტიკ მოპყრობასა და თავისუფლების უკანონო აღკვეთაში ცნო დამნაშავედ.

სასამართლომ დაადგინა, რომ მშობლებს 13 შვილი წლების განმავლობაში გამოკეტილი ჰყავდათ. ყველაზე უფროსი შვილი 29 წლის იყო. როგორც შემდგომში გაირკვა, მშობლები მათ საწოლზე აბამდნენ, დღეში ერთხელ აჭმევდნენ და მხოლოდ წელიწადში ერთხელ დაბანის უფლებას აძლევდნენ.

დანაშაულის შესახებ მხოლოდ მას შემდეგ გახდა ცნობილი, რაც 2018 წლის იანვარში 17 წლის შვილი გაიქცა და პოლიციას წამების შესახებ შეატყობინა.