პრემიერ-მინისტრმა მამუკა ბახტაძემ, ეკონომიკის მინისტრის, გიორგი ქობულიას მიერ თანამდებობის დატოვებასთან დაკავშირებით დღეს, 19 აპრილის მთავრობის სხდომის დაწყებამდე განმარტა, რომ საკადრო გადაწყვეტილება თავად მიიღო:

"გადაწყვეტილება მივიღე მე. გოგამ [ქობულიამ] ხო გიპასუხათ, პრემიერი იღებს გადაწყვეტილებასო".

პრემიერის თქმით, საკადრო გადაწყვეტილება გიორგი ქობულიასთან საუბრის შედეგად მიიღო:

"გიორგი ქობულიას განვლილი გზა, კარიერული გზა, არის ნათელი მაგალითი, თუ რა კომპეტენციის მატარებელია ეს ადამიანი... მას აქვს მნიშვნელოვანი ცოდნა, რომელიც გამოიყენა იმ განვითარების გეგმების მოსამზადებლად, რომელიც თავს იყრის ეკონომიკის სამინისტროში. დარწმუნებული ვარ, იგი მომავალშც გამოგვადგება".

პრემიერი-მინისტრმა მამუკა ბახტაძემ გიორგი ქობულია ეკონომიკის მინისტრის თანამდებობიდან 18 აპრილს საღამოს გადააყენა. ამავე საღამოს ახალ მინისტრად პრემიერმა ქობულიას მოადგილე, ნათია თურნავა დანიშნა.

ქობულიას სამომავლო გათავისუფლების შესახებ ინფორმაცია რამდენიმე დღის წინ გავრცელდა, თუმცა ყოფილი მინისტრი კითხვებზე პასუხს არ სცემდა. 18 აპრილს კი მან განაცხადა, რომ მის გადაყენებასთან დაკავშირებით კითხები პრემიერ-მინისტრის მიმართ უნდა დასმულიყო.

ამავე თემაზე: