საქართველოს პრემიერმინისტრი გიორგი კვირიკაშვილი გაეროში შეხვედრაზე, რომლის თემაც დევნილთა და მიგრანტთა გახშირებული გადაადგილებებია, სიტყვით გამოვიდა, და განაცხადა, რომ მსოფლიო უსაფრთხოებაში საქართველო თავის წვლილს შეიტანს:

"საქართველო საკმაოდ პატარა ქვეყანაა და ჩვენც გვაქვს უსაფრთხოებასთან დაკავშირებული გამოწვევები, მაგრამ ჩვენ მომავალშიც შევიტანთ წვლილს საერთაშორისო ძალისხმევაში, რომელიც მიმართულია მიგრანტებისა და ლტოლვილების მასობრივი გადაადგილების მართვისკენ".

კვირიკაშვილმა აღნიშნა, რომ იძულებით გადაადგილების ტვირთის სიმძიმეს საქართველოც განიცდის:

"90-იანი წლების დასაწყისიდან მოყოლებული, რუსეთის ფედერაციის მიერ საქართველოს კუთვნილი აფხაზეთისა და ცხინვალის/სამხრეთ ოსეთის რეგიონების ოკუპაციის პირობებში რამდენჯერმე განხორციელდა ეთნიკური წმენდა. დაახლოებით 400 ათასი ადამიანი იქცა იძულებით გადაადგილებულ პირად მაშინ, როცა საქართველოს მოსახლეობა სულ ოთხ მილიონს შეადგენს. საოკუპაციო ხაზების გაყოლებაზე მავთულხლართების განთავსების პირობებში მათი შინ დაბრუნების პერსპექტივა არცთუ ისე იმედისმომცემია. ამასობაში კი ოკუპირებულ ტერიტორიებზე მცხოვრები ეთნიკური ქართველები ყოველდღიურად განიცდიან დისკრიმინაციას. უბრალოდ დაუშვებელია ამაზე და მსოფლიოში მიმდინარე სხვა პროცესებზე თვალის დახუჭვა".

პრემიერმინისტრმა აღნიშნა, რომ საქართველომ უკვე მიიღო თავშესაფრის 4 000-ზე მეტი მაძიებელი მსოფლიოს სხვადასხვა კუთხიდან, რომელთა შორისაა - უკრაინა, ერაყი, სირია, ეგვიპტე და სომალი. მათ ქართული უნივერსიტეტები სპეციალურ საგანმანათლებლო პროგრამებს სთავაზობენ.