11 აპრილს თანამედროვე ისტორიის ყველაზე მასშტაბური დემოკრატიული არჩევნები დაიწყო — ინდოეთში ახალ პარლამენტს ირჩევენ. ქვეყანაში, სადაც 900 მილიონზე მეტი ამომრჩეველია, მილიონზე მეტი საარჩევნო უბანი გაიხსნება. ხმის მიცემის პერიოდი კი ხუთ კვირაზე მეტხანს გაგრძელდება.

პარტიები პარლამენტის ქვედა პალატაში, ლოკ-საბჰაში 543 ადგილისთვის იბრძოლებენ. ის პარტია, რომელიც ადგილების ნახევარს და მეტს მიიღებს მთავრობას ჩამოაყალიბებს, ხოლო მისი ლიდერი პრემიერ-მინისტრი გახდება.

მოქმედი პრემიერ-მინისტრი ნარენდა მოდი, რომელიც ინდოეთის სახალხო პარტიას ხელმძღვანელობს, შეეცდება 2014 წლის წარმატება გაიმეოროს. წინა საპარლამენტო არჩევნებზე ის მოსახლეობას დაპირდა, რომ ინდოეთისგან ეკონომიკურ და სამხედრო ზესახელმწიფოს შექმნიდა. მოდის ოპონენტი, რაჰულ განდი, ინდირა განდის შვილიშვილი ინდოეთის ეროვნულ კონგრესს ლიდერობს. ის მოდის ქვეყანაში დემოკრატიული ინსტიტუტების რღვევაში ადანაშაულებს.

ამჟამინდელი არჩევნები მსოფლიოში ყველაზე ძვირადღირებული იქნება — ინდოეთი 7 მილიარდ დოლარს დახარჯავს. თითოეულ ამომრჩეველზე ეს, დაახლოებით, 8 დოლარია მაშინ, როცა მოსახლეობის ნახევარს დღეში მხოლოდ 3 დოლარის შემოსავალი აქვს. შედარებისთვის, 2016 წელს ამერიკაში საპრეზიდენტო და კონგრესის არჩევნებში 6,5 მილიარდი დოლარი დაიხარჯა.

წინა საპარლამენტო არჩევნებში 830 მილიონი ამომრჩეველი ფიქსირდებოდა. ამჟამად თითქმის მილიარდი ამომრჩეველი ქვეყნის სხვადასხვა ტერიტორიაზე ცხოვრობს, მათ შორის უდაბნოებში, ჭაობიან და მთიან ადგილებში. კანონის მიხევდით კი საარჩევნო უბანი ამომრჩევლის საცხოვრებლიდან მაქსიმუმ 2 კილომეტრში უნდა იყოს.

ინდოეთის საარჩევნო კომისიაში 300 ადამიანი მუშაობს, ხოლო არჩევნების დღისთვის მათ 10 მილიონი ადამიანის დამატება დასჭირდათ. საარჩევნო კომისიის წევრებს დიდი მანძილის გადალახვა მოუწევთ: ზოგიერთ რთულ რეგიონში მოხვედრა მხოლოდ ვერტმფრენით ან ნავით არის შესაძლებელი. ხანდახან კი საარჩევნო კომისიის თანამშრომლებს სპილოებით გადაადგილება მოუწევთ.

იმისათვის, რომ ე.წ. კარუსელი აირიდონ თავიდან, ამომრჩევლებს საჩვენებელ თითზე რთულად მოსაშორებელ მელანს წაუსვამენ. საარჩევნო პროცესის სირთულის გამო, ხმის მიცემა შვიდ ეტაპად განხორციელდება, დაიწყება 11 აპრილს და 19 მაისს დასრულდება. შედეგები კი 23 მაისს გახდება ცნობილი.