სურსათის ეროვნული სააგენტოს ინფორმაციით, ოზურგეთის მუნიციპალიტეტში დააჯარიმეს კომპანია, რომელიც საბავშვო ბაღებს ხორცით ამარაგებდა. უწყების წარმომადგენლის განცხადებით, ინსპექტირებამ დაადგინა, რომ ხორცის ფერი იყო ვიზუალურად შეუსაბამო და ჰქონდა სუნი.

ოზურგეთის მუნიციპალიტეტის სკოლამდელი აღზრდის ცენტრის დირექტორი, მაკა ჭყონია რუსთავი 2-თან საუბარში აცხადებს, რომ ინფორმაცია სეს-ს მათ მიაწოდეს. მისი თქმით, კომპანიასთან ხელშეკრულება გაწყვიტეს.

კომპანიის წარმომადგენელი კი აცხადებს, რომ ხორცი უვნებელი იყო და მათ უმიზეზოდ ავიწროებენ. მისივე თქმით, საწარმოო პროცესის შეჩერება და ამოღებული ხორცის განადგურება არასაჭირო ზომებია, რადგან ხორცის ხარისხი ყველა სტანდარტს აკმაყოფილებდა.