თბილისის მერის, კახა კალაძის თქმით, გუშინ ჭავჭავაძის #5-ში დაღუპული ორი მუშის სოლიდარობის აქციას "პოლიტიკური შემადგენელი ჰქონდა".

მისი თქმით, აპირებდა აქციის მონაწილეებთან შეხვედრას და მათთან საუბარს, თუმცა აქციაზე კონკრეტული სახეების დანახვის შემდეგ გადაიფიქრა.

"მე, როდესაც ვნახე შემდეგ კადრები, ვნახე, ვინ იყო ამ აქციის ორგანიზატორი. ამ აქციას ახლდა პოლიტიკური შემადგენელი, აღარ გავაგრძელებ, ვინ დგას ამის უკან და ვინ მართავს ამ ყველაფერს", — განაცხადა კახა კალაძემ.

გუშინ, პირველ აპრილს სოლიდარობის ქსელის ორგანიზებით შრომის უსაფრთხოების მოთხოვნით აქცია-მსვლელობა გაიმართა. აქციის მონაწილეები საქართველოს კანცელარიასთან შეიკრიბნენ და მსვლელობით ჭავჭავაძის #5-ისკენ გაემართნენ. დემონსტრანტების ოდენობის გამო გზის სავალი ნაწილიც გადაიკეტა.

აქციაზე პოლიცია და დემონსტრანტები ერთმანეთს რამდენჯერმე დაუპირისპირდნენ. პოლიციისთვის წინააღმდეგობის გაწევის მუხლით 6 პირი დააკავეს, ექვსივე გუშინ, გვიან ღამით ხელწერილის საფუძველზე გაათავისუფლეს. დაკავებულებს შორის იყვნენ, კონსტიტუციონალისტი ვახუშტი მენაბდე და თეთრი ხმაურის მოძრაობის წევრი დავით სუბელიანი.

აქციის მონაწილეებმა პასუხისმგებელ პირებთან შეხვედრა მოითხოვეს. თბილისის მერმა კახა კალაძემ სამუშაო ფორმატში შეხვედრის მზაობა გამოხატა, თუმცა დემონსტრანტები არ დათანხმდნენ. აქცია კახა კალაძის სახლთან დასრულდა და შემდგომი აქტივობების განხორციელების მიზნით მოძრაობის შექმნა დაანონსდა.