სამუშაო ადგილებზე შრომის უსაფრთხოების დაცვის მოთხოვნით გამართული აქციის წევრები ჭავჭავაძის გამზირზე დასხდნენ და აცხადებენ, რომ მინისტრების მოსვლამდე არ დაიშლებიან. დემონსტრანტები პრემიერ-მინისტრთან, მამუკა ბახტაძესთან, ჯანდაცვისა და ეკონომიკის მინისტრებთან, დავით სერგეენკოსთან და გიორგი ქობულიასთან, ასევე თბილისის მერთან, კახა კალაძესთან შეხვედრას მოითხოვენ. ისინი ხელისუფლების წარმომადგენლებს დროს 23:00-მდე აძლევენ. აქცია 7 საათიდან მიმდინარეობს.

On.ge ყველა იმ უწყებას დაუკავშირდა, რომელსაც აქციის მონაწილეები მომხდარზე პასუხისმგებლობას აკისრებენ. როგორც პრემიერ-მინისტრის აპარატში, ისე ეკონომიკისა და ჯანდაცვის სამინისტროში განაცხადეს, რომ მინისტრები აქციის მონაწილეებთან მისვლას ჯერ არ გეგმავენ. თბილისის მერის, კახა კალაძის პოზიცია უცნობია. მის პასუხს On.ge ამ დრომდე ელოდება.

თბილისში შრომის უსაფრთხოების დაცვის მოთხოვნით აქცია იმართება. აქციის მონაწილეები აპროტესტეს გუშინ, 31 მარტს ჭავჭავაძის #5-ში მშენებლობის დროს მომხდარ შემთხვევას, რა დროსაც ორი მუშა დაიღუპა.

მთავრობის ადმინისტრაციასთან დაწყებულმა აქციამ მსვლელობის ფორმა მიიღო. აქციის მონაწილეებმა პროტესტის ნიშნად ჭავჭავაძის 5 ნომერში გადაინაცვლეს.