ჯანდაცვის სამინისტროს შრომის ინსპექტირების დეპარტამენტის ხელმძღვანელმა, ბექა ფერაძემ On.ge-ს განუცხადა, რომ ჭავჭავაძის გამზირის #5-ში სამუშაოების მწარმოებელ ძირითად კომპანია შპს ლეჩკომბინატს შემთხვევის ადგილზე სამუშაოების წარმოების უფლება დროებით შეუჩერდა. შპს ლეჩკომბინატი იმ ადგილზე ახორციელებდა მშენებლობას, სადაც გუშინ, 31 მარტს შენობის საძირკვლის გამაგრების დროს მიწა ჩამოიშალა და ორი მუშა იმსხვერპლა.

ამ კომპანიასთან ერთად დაჯარიმდნენ ქვეკონტრაქტორებიც. უფრო კონკრეტულად, შპს ტრანსმშენი ინსპექტირების პროცესში ხელისშეშლის გამო დღეს 7 000 ლარით დაჯარიმდა. ხოლო კომპანია ხიმიჯ სერვისი — 1000 ლარით. მას არ ჰქონდა შესაბამისი რეგისტრაცია მძიმე, მავნე და საშიში სამუშაოების წარმოებისთვის.

"მოკვლევა დაწყებულია, დღის განმავლობაში ინსპექტორები სამუშაო ადგილს იკვლევდნენ. გამოვლინდა რამდენიმე შეუსაბამობა. კომპანიამ უნდა წარმოადგინოს შესაბამისი დოკუმენტაცია და ამის შემდეგ შედგება ისნპექტირების დასკვნა. იყო კუსტარული მანქანა-დანადგარები, ასევე, სხვადასხვა ადგილას იყო ღიობები, რომლებიც შესაბამისი წესით არ იყო დაცული. ხარვეზები იყო დაფიქსირებული, თუმცა უნდა დაველოდოთ გამოძიებას", — განუცხადა On.ge-ს ბექა ფერაძემ.

ჭავჭავაძის #5-ში მომხდარ შეხვედრას, რომელსაც ორი მუშა ემსხვერპლა შინაგან საქმეთა სამინისტრო სისხლის სამართლის კოდექსის 240-ე მუხლით იძიებს. ამ წუთებში, მომხდარს აქციის მონაწილეები აპროტესტებენ. პროტესტის ორგანიზატორები ადგილზე მთავრობის წარმომადგენლებს იბარებენ. On.ge-ს მთავრობაში, ჯანდაცვისა და ეკონომიკის სამინისტროში განუცხადეს, რომ აქციის მონაწილეებთან ამ დროისთვის შეხვედრა არ იგეგმება. თბილისის მერის პასუხს კი ამ დრომდე ველით. აქციის მონაწილეებმა ჭავჭავაძის გამზირი გადაკეტეს და აცხადებენ, რომ დაშლას არ აპირებენ.