სახალხო დამცველი 2018 წლის ანგარიშში ხორავას ქუჩაზე მოკლული დავით სარალიძის საქმეზეა საუბარი. დოკუმენტში აღნიშნულია, რომ გამოძიება შესაძლოა, დამნაშავეთა გამოვლენის საჯარო ინტერესს არ ემსახურებოდა.

როგორც სახალხო დამცველი წერს, სასამართლო განაჩენმა დაადასტურა, რომ გამოძიებამ ვერ გამოავლინა ყველა დამნაშავე. შესწავლილ მასალებზე დაყრდნობით კი ომბუდსმენი აღნიშნავს, რომ გამოძიება სხვადასხვა მიმართულებით არაეფექტიანი იყო და მრავალი ხარვეზი გამოვლინდა.

"ჩაუტარებელი ან დაგვიანებით ჩატარებული საგამოძიებო მოქმედებების და კომისიის სხდომაზე დაკითხვისას გამოძიებაზე პასუხისმგებელი პირების მიერ საგამოძიებო ტაქტიკაზე გაცემული პასუხების ერთობლივი ანალიზით სახალხო დამცველი მივიდა დასკვნამდე, რომ გამოძიების ტაქტიკა შესაძლოა არ ემსახურებოდა დამნაშავეთა გამოვლენის საჯარო ინტერესს", — ნათქვამია ანგარიშში.

სახალხო დამცველის აპარატისთვის გაუგებარი იყო, რა კონკრეტული სტრატეგია და ლეგიტიმური მიზანი განაპირობებდა გამოძიების პასიურობას. გარდა ამისა, ანგარიშში აღნიშნულია, რომ სახეზე იყო სამოხელეო დანაშაული: სამსახურებრივი გულგრილობა, ან სამსახურებრივი უფლებამოსილების ბოროტად გამოყენება.

სახალხო დამცველმა რამდენჯერმე მიმართა რეკომენდაციით, რომ სამოხელეო დანაშაულზე დაწყებულიყო გამოძიება და დანაშაულში მონაწილე პირისთვის ჯგუფურ მკვლელობაში ბრალი წარედგინათ. მათივე თქმით, რეკომენდაციები პროკურატურას არცერთ ეტაპზე არ გაუთვალისწინებია და გამოძიებაში დაშვებულ შეცდომებზე მხოლოდ სამსახურებრივი შემოწმება დაიწყო, რადგან აღნიშნული ხარვეზები დანაშაულად არ მიაჩნია. შემოწმება ჯერ კიდევ მიმდინარეობს და მასზე წარმოება არ დასრულებულა.

ომბუდსმენს მიაჩნია, რომ პროკურატურამ ამ საქმის მიმართ არაერთგვაროვანი მიდგომა გამოავლინა.

"სხვა შემთხვევაში, სადაც პირის სიცოცხლის მოსპობაზე დაწყებული გამოძიება არაეფექტიანად წარიმართა, პროკურატურამ სამართალდამცავი ორგანოების თანამშრომლების მიერ სამსახურებრივი გულგრილობის ჩადენის ფაქტზე გამოძიება დაიწყო", — აღნიშნულია ომბუდსმენის ანგარიშში.

ამავე თემაზე: