პარტია ქართული ოცნებიდან წასული დეპუტატი ეკა ბესელია ამბობს, რომ უმრავლესობის წევრმა მამუკა მდინარაძემ, შეტყობინება შეცდომით მიწერა. მისი თქმით, გზავნილში გაწერილი შეფასებები ეკა ბესელიას დღევანდელ განცხადებაზე იყო.

"ფერების არევიდან მესიჯების არევამდე ერთი ნაბიჯია. მე არ მიკვირს იმ ადამიანების, ვისაც აერია არამხოლოდ ის ვექტორები, რითაც ქართულმა ოცნებამ უნდა იაროს 2012 წლის შემდეგ, უკვე წითელსა და მწვანეს შორის აქვთ პრობლემები. მესიჯებს, რომელიც მომზადებულია ყველაზე ცუდი ენით, შეურაცხმყოფელი ენით, იმას უგზავნიან ვის წინააღმდეგაც მოამზადეს და აღმოჩნდა, ჩემს პერსონალურ WhatsApp შეტყობინებაში. ბატონმა მდინარაძემ ასე გადმომიგზავნა მე და მე მივწერე, მე უნდა გავახმოვანო ეს ჩემთან დაკავშირებით-მეთქი?".

მამუკა მდინარაძე ადასტურებს, რომ მესიჯი ბესელიას შეცდომით ნამდვილად მიწერა, თუმცა აცხადებს, რომ გზავნილი "პარტიული" არ ყოფილა:

"ნინო წილოსანმა მკითხა, რა პოზიციები იყო, დღეს რა მესიჯები გახმოვანდა და ჩამოყრილი მქონდა და ახლავე ჩაგიგდებ მეთქი ვუთხარი, წინ ვეჯექი, მის ოთახში და შეცდომით, ეტყობა ბესელიაზე ბევრს ვფიქრობ და გადავუგზავნე. შემდეგ თითქოს მე ბოდიშები მიხდია, მსგავსი არ ყოფილა. ჩვენ გავაგრძელეთ მიმოწერა, მე და ეკამ. ის მესიჯი წავშალე, არ იყო ეკასთვის განკუთვნილი".