ნიკა გვარამიასა და პაატა ბურჭულაძეს შორის სატელეფონო საუბრის ჩანაწერის გავრცელებასთან დაკავშირებით, თავდაცვის მინისტრი ლევან იზორია აცხადებს, რომ სახელმწიფო უსაფრთხოების სამსახური ქვეყნის უსაფრთხოების უზრუნველყოფის ფუნქციას მიუკერძოებლად ასრულებს.

სუს-ის ყოფილი ხლემძღვანელის თქმით, ამ ფუნქციის განხორციელების ფარგლებში, თითოეული პიროვნების პერსონალური უფლება მაქსიმალურადაა დაცული:

"როგორც ამ სამსახურის ძველი წარმომადგენელი, რომელმაც ვიცი რა ამ მიუკერძოებლობის და პერსონალური მონაცემების დაცვის მაღალი ხარისხი, სრული პასუხისმგებლობით შემიძლია ვთქვა, რომ სუს თავის ფუნქციებს ახორციელებს კანონის ფარგლებში".

გავრცელებულ აუდიო ჩანაწერზე სახელმწიფო ხალხისთვის ლიდერი პაატა ბურჭულაძე აცხადებს, რომ ჩანაწერი მასსა და ნიკა გვარამიას შორის ნამდვილად შედგა, თუმცა ეს ვერსია დამონტაჟებულია.

ტელეკომპანია რუსთავი 2-ის გენერალური დირექტორი ნიკა გვარამია ასევე აცხადებს, რომ ნამდვილად ღია ხაზზე ესაუბრა პაატა ბურჭულაძეს, რადგან მისივე თქმით, დასამალი არაფერი ჰქონდა. იგი თავისი სატელეფონო ჩანაწერის გავრცელებაში სახელმწიფო უსაფრთხოების სამსახურს ადანაშაულებს.

სახელმწიფო უსაფრთხოების სამსახურმა On.ge-სთან საუბარში განაცხადა, რომ უწყება უარყოფს გვარამიას ბრალდებას. აღნიშნულ საქმეზე, შსს-მ უკვე დაიწყო გამოძიება.