ევროპული საქართველო საბანკო რეგულაციებთან დაკავშირებით საკომიტეტო მოსმენაზე ეროვნული ბანკის პრეზიდენტს, კობა გვენეტაძეს ისევ იბარებს. პარტიის თავმჯდომარე, დავით ბაქრაძე აცხადებს, რომ უკვე ჩანს რეგულაციების შედეგი და გვენეტაძემ კითხვებს პასუხები უნდა გასცეს.

"კარგად ჩანს ათიათასობით ადამიანი რომელიც დაზარალდა იმიტომ, რომ ვეღარ ახერხებს საყოფაცხოვრებო ტექნიკის ყიდვას, ვეღარ ახერხებს იპოთეკური სესხის აღებას და ბინის ყიდვას, უკვე დაზარალდა ბიზნესი და ჩვენ ვხედავთ შემცირებულ ბრუნვას და დახურულ მაღაზიებს და უკვე დაზარალდა და გაიზარდა ქვეყანაში უმუშევრობის დონე", — აცხადებს ბაქრაძე.

პარტიას მიაჩნია, რომ რეგულაციები უნდა გადაისინჯოს და საბოლოოდ გაუქმდეს, რადგან მოსახლეობას ცხოვრება გაურთულდა.

ეროვნული ბანკის პრეზიდენტი ევროპული საქართველოს მიწვევით პარლამენტში 26 თებერვალს მივიდა. თუმცა, გვენეტაძემ განაცხადა, რომ რეგულაციებზე მსჯელობა ჯერ ადრე იყო, რადგან კონკრეტული შედეგები არ ჰქონდათ.

მაშინ დავით ბაქრაძე დათანხმდა რეგულაციებზე მოგვიანებით ემსჯელათ, იმ პირობით, რომ სხდომაზე თიბისი ბანკის საქმეს განიხილავდნენ. თუმცა, კომიტეტი ერთსაათიანი მსჯელობის შემდეგ ფორმატზე ვერ შეთანხმდა და სხდომაზე არცერთი საკითხი არ განუხილავთ.