გელაპის ინსტიტუტის კვლევის მიხედვით, უკრაინაში მთავრობისადმი უნდობლობის მსოფლიოში ყველაზე მაღალი მაჩვენებელია. კვლევა 2018 წელს ეხება და უკრაინის საპრეზიდენტო არჩევნებამდე ერთი კვირით ადრე გამოქვეყნდა. უკვე ორი წელია ზედიზედ უკრაინა ამ რეიტინგის სათავეშია.

კვლევის თანახმად, 2018 წელს მოსახლეობის მხოლოდ 9 პროცენტი ენდობოდა მთავრობას. ამავე დროს, მოქალაქეების 91 პროცენტი ხელისუფლებაში კორუფციას ხედავს. გელაპის ინსტუტის თქმით, საბჭოთა კავშირის ყოფილ ქვეყნებში მთავრობისადმი ნდობის საშუალო მაჩვენებელი 48 პროცენტია, ხოლო მთელ მსოფლიოში — 56 პროცენტი, ამის ფონზე კი უკრაინის მაჩვენებელი რეკორდულად დაბალია.

კვლევაში, ასევე, აღნიშნულია, რომ პრეზიდენტ ვიქტორ იანუკოვიჩის დროს მთავრობას მოსახლეობის 24 პროცენტი ენდობოდა. ასეთივე შედეგი იყო პეტრო პოროშენკოს პრეზიდენტობის დასაწყისში. ამავე დროს, მოსახლეობის 48 პროცენტი პოროშენკოს ქმედებებს ამართლებდა, თუმცა დროდადრო რეიტინგმა დაიწია და 2015 წლიდან მთავრობისადმი ნდობის მაჩვენებელი 14 პროცენტზე მაღალი არ ყოფილა.

მთავრობისადმი ნდობის გარდა კვლევა უშუალოდ არჩევნებსაც შეეხო. როგორც ვკითხულობთ, 2018 წელს მოქალაქეების მხოლოდ 12 პროცენტს სჯეროდა, რომ არჩევნები სამართლიანად ჩატარდებოდა, რაც 2014 წლის არჩევნებთან შედარებით 14 პროცენტით ნაკლებია.