პარლამენტმა უზენაეს სასამართლოში მოსამართლეების შერჩევის კრიტერიუმებზე ქართული ოცნების კანონპროექტს პირველი მოსმენით მხარი დაუჭირა. პროექტს მხარი დაუჭირა 89-მა დეპუტატმა, ხოლო წინააღმდეგი 31 იყო.

კანონპროექტის ინიციატორები არიან: ირაკლი კობახიძე, არჩილ თალაკვაძე, მამუკა მდინარაძე, ანრი ოხანაშვილი, გიორგი კახიანი, დავით მათიკაშვილი და გურამ მაჭარაშვილი.

ქართული ოცნების კანონპროექტის განმარტებით ბარათში ვკითხულობთ, რომ აღნიშნული პროექტით რეგულირდება საქართველოს უზენაესი სასამართლოს მოსამართლეთა კანდიდატების იუსტიციის უმაღლესი საბჭოს მიერ შერჩევის პროცედურა, დგინდება მოსამართლეთა საკვალიფიკაციო მოთხოვნები და იუსტიციის უმაღლესი საბჭოს მიერ შერჩეული კანდიდატების საქართველოს პარლამენტისთვის ასარჩევად წარდგენის პროცედურა. აღნიშნული პროცედურა კი ხუთ ეტაპად იყოფა.

ამავე სხდომაზე კენჭი უყარეს ევროპული საქართველოს კანონპროექტს, რომელსაც მხარი მხოლოდ 24-მა დეპუტატმა დაუჭირა, ხოლო წინააღმდეგი 42 იყო. ამასთანავე, დეპუტატებმა მხარი არ დაუჭირეს ეკა ბესელიასა და კიდევ 12 დეპუტატის პროექტს — 22 მომხრე, 35 წინააღმდეგი.