ვენესუელის პრეზიდენტმა, ნიკოლას მადურომ თავის მთავრობას გადადგომა მოსთხოვა. ამის შესახებ მისმა ვიცე-პრეზიდენტმა, დელსი როდრიგესმა ტვიტერზე დაწერა. როგორც პოსტში აღნიშნულია, მინისტრთა კაბინეტის გადადგომა "ნებისმიერი საფრთხისგან ბოლივარის სამშობლოსა და ჩავესის" დაცვისთვის არის საჭირო. თვითონ მადუროს ჯერჯერობით განცხადება არ გაუვრცელებია.

ვენესუელაში მადუროს რეჟიმის პირობებში მძიმე ეკონომიკურ და ჰუმანიტარულ კრიზისს განიცდის. ქვეყნის ინფლაციამ მილიონ პროცენტს გადააჭარბა. რამდენიმე დღის წინ კი თითქმის მთელ ქვეყანაში ელექტროენერგია გაითიშა, რამაც წყლის დეფიციტიც შექმნა.

მადუროს გადადგომის მოთხოვნით კარაკასში მასობრივი საპროტესტო აქციები იანვრის ბოლოს დაიწყო. პარლამენტის ოპოზიციონერმა თავმჯდომარემ საკუთარი თავი პრეზიდენტობის მოვალეობის შემსრულებლად გამოაცხადა და ახალი არჩევნების ჩატარება მოითხოვა. გუაიდოს ლეგიტიმურობა ლათინური ამერიკისა და დასავლეთის ქვეყნების დიდმა ნაწილმა აღიარა.