თბილისის საკრებულომ დედაქალაქის მიწათსარგებლობის გენერალური გეგმა დღეს, 2019 წლის 15 მარტს მიიღო. გენგეგმას მხარი 37-მა დეპუტატმა დაუჭირა, ოთხი კი წინააღმდეგი იყო. გენერალური გეგმა სამ ძირითად კონცეპტუალურ მიმართულებას მოიცავს — მწვანე, შეკავშირებული და კომპაქტური ქალაქი.

გენერალური გეგმის პროექტი საკრებულოს წევრებს დედაქალაქის მერის მოადგილემ, მაია ბითაძემ და ურბანული განვითარების საქალაქო სამსახურის უფროსმა, ალექსანდრე ტოგონიძემ წარუდგინეს.

ბითაძის თქმით, ახალი დოკუმენტით სატყეო ზონები და სამი ტიპის რეკრეაციალი ზონა ყალიბდება, ასევე, დადგინდა განაშენიანების კონტურები, განისაზღვრა ისტორიულ-კულტურული და ლანდშაფტური ზონები, რომელიც რეგულირების ზონიდან ამოღებული იყო.

თბილისის მერის მოადგილემ რამდენიმე ცდომილებაზე გაამახვილა ყურადღება, რომელთა გამოსწორებისთვისაც საკრებულოს მხარდაჭერა სთხოვა. ამ ცდომილებებიდან ერთ-ერთი ბოტანიკურ ბაღს ეხება. როგორც მაია ბითაძემ განაცხადა, ბოტანიკურ ბაღს ისტორიული ძეგლის სტატუსი აქვს და იქ ლანდშაფტურის გარდა, რაიმე სხვა სახის საქმიანობა დაუშვებელია.