გირჩი აცხადებს, რომ აუდიტის სამსახურს იმ დრომდე არ მიაწვდის ანგარიშს, სანამ წინასაარჩევნო პერიოდში ვალების განულების პროგრამას არ შეისწავლის და ეუთოს დასკვნას არ შეასრულებს. ამის შესახებ ინფორმაციას პარტია ფეისბუქით ავრცელებს.

წერილში პარტია აღნიშნავს, რომ ქართულმა ოცნებამ ვალების განულების პროგრამა საარჩევნოდ გამოიყენა და არჩევნებზე სხვადასხვა ფორმით ათეულობით მილიონი ლარი დახარჯა. გირჩი განმარტავს, რომ მოქმედი კანონმდებლობით, მსგავსი ქმედებები სისხლისსამართლებრივად დასჯადია.

"ჩვენ მიგვაჩნია, რომ ბიძინა ივანიშვილს აქვს უფლება, როგორც უნდა დახარჯოს თავისი ფული და დადოს ნებისმიერი ნებაყოფლობითი გარიგება სხვა ადამიანებთან. ჩვენ გვჯერა, რომ ადამიანებთან დადებული ვერანაირი ნებაყოფლობითი გარიგება ვერ იქნება დანაშაული და შესაბამისად, შეუძლებელია არსებობდეს კრიმინალი სახელად ამომრჩევლის მოსყიდვა", — წერია წერილში.

პარტიაში აცხადებენ, რომ მათ ფულს იდეის გულშემატკივარი ადამიანები, ხშირად ემიგრანტები სწირავენ. თუმცა, ქვეყნის კანონმდებლობით მათ ეს ეკრძალებათ მაშინ, როცა აუდიტის სამსახურის აზრით, ქართუ ბანკსა და ბიძინა ივანიშვილს უფლება აქვს წინასაარჩევნოდ გაუუქმოს 4 მილიარდ ლარზე მეტი დავალიანება 600 ათასზე მეტ ამომრჩეველს.

"ამომრჩევლის მოსყიდვამ, როგორც სახელმწიფოს კონტროლს დაქვემდებარებულმა მოვლენამ, ამ არჩევნების შემდეგ დაკარგა შინაარსი და ბიძინა ივანიშვილის გასამართლებამდე თუ რომელიმე პოლიტიკური ძალის მიმართ იქნება გამოყენებული, რეალურად, იქნება არა რეგულირება, არამედ პოლიტიკური ოპონენტის აშკარა და ცინიკური დევნა. მიგვაჩნია, რომ ეს არის აბსურდი და უნდა დავამთავროთ ერთხელ და სამუდამოდ", — ნათქვამია წერილში.

არჩევნების მეორე ტურამდე რამდენიმე დღით ადრე მთავრობა "შავ სიაში" მყოფ 600 ათასი ადამიანს ჯამში 1,5 მილიარდის ოდენობის დავალიანების განულებაზე ინფორმაცია გაავრცელა. ვალების ჩამოწერის საკითხის შესწავლა აუდიტის სამსახურმა იმ მიზეზით, რომ "მათ მანდატსა და კომპეტენციას სცილდებოდა" არ დაიწყო.