ეკონომიკის მინისტრი, გიორგი ქობულია აღიარებს, რომ თიბისის დამფუძნებლების, მამუკა ხაზარაძისა და ბადრი ჯაფარიძის ირგვლივ შექმნილი ნეგატიური ფონი, კერძო ინვესტორებს "მინიმალური კაპიტალის" შეგროვებას ურთულებს "ანაკლიის პროექტის დასაძრავად".

ამასთან მინისტრი ამბობს, რომ პროექტის გაჭიანურება არ უკავშირდება მხოლოდ თიბისის ირგვლივ განვითარებულ მოვლენებს და რომ ბიზნესს მანამდეც უჭირდა კერძო სახსრების მოზიდვა. მისივე განმარტებით, ამ პროექტში კერძო სექტორის როლი უფრო ორგანიზაციულია:

"ინვესტორები, რომლებიც ფულს აბანდებენ ამ პროექტში, ესაა ოთხი მნიშვნელოვანი და დიდი საერთაშორისო საფინანსო ინსტიტუტი, ეს არის 400 მილიონ აშშ დოლარამდე, ესაა მთავრობა 100 მილიონ აშშ დოლარამდე და დანარჩენი 100 მილიონი აშშ დოლარი ესაა რამდენიმე ინვესტორი და კონსორციუმი, სადაც დიდ როლს თამაშობს კერძო სექტორი, მაგრამ ამ პროექტის ორგანიზატორების შენატანი არ არის ესეთი მნიშვნელოვანი".

2016 წელს ანაკლიის განვითარების კონსორციუმმა და სახელმწიფომ ერთობლივად დაიწყეს პროექტზე მუშაობა. ანაკლიის განვითარების კონსორციუმში შედის თიბისი ჰოლდინგ საქართველო. პროექტის მიხედვით, სამუშაოების სრულად დასრულების შემდეგ, ის 3 000 ჰექტარზე მეტ ფართობზე იქნება გაშლილი, რომელსაც 32 ნავმისადგომი ექნება. ანაკლიის პორტის გამტარუნარიანობა, წელიწადში, 100 მლნ ტონა იქნება. პორტი ოკუპირებული ტერიტორიებიდან რამდენიმე ათეული კილომეტრითაა დაშორებული.