ქართული ოცნება მიიჩნევს, რომ 2012 წლიდან დღემდე რეპრესიული ნარკოპოლიტიკა ჩანაცვლდა სახელმწიფოს დაბალანსებული ნარკოპოლიტიკით. მნიშვნელოვნად გაიზარდა ჯანდაცვის სერვისებზე ხელმისაწვდომობა დამოკიდებული პირებისათვის.

მმართველი პარტიის საარჩევნო პროგრამაში საუბარია ხელისუფლების სხვა მიღწევებზე ნარკოპოლიტიკის მიმართულებით: "გაუქმდა ზედოზირების შემთხვევების სამედიცინო პერსონალის მიერ პოლიციისათვის ცნობების პრაქტიკა. სახელმწიფოს მიერ მიღებული ზომების შედეგად, ქვეყანაში 99%-ით შემცირდა კუსტარული ნარკოტიკების, ხოლო 90%-ზე მეტით - ე.წ. ბიონარკოტიკის მოხმარება. ნარკოტიკული დანაშაულისა და ნარკოტრანზიტის წინააღმდეგ ბრძოლამ უპრეცედენტო მასშტაბებს მიაღწია. განისაზღვრა ფარმაცევტის პასუხისმგებლობა ფსიქოტროპული მედიკამენტების ურეცეპტოდ გაცემაზე".

ქართული ოცნების დაპირების მიხედვით, მოხდება სასჯელის ლიბერალიზაცია მსუბუქი
ნარკოტიკების მოხმარებასთან მიმართებით. სახელმწიფო გააუმჯობესებს ნარკოდამოკიდებული პირებისათვის ჯანდაცვის სერვისების ხელმისაწვდომობასა და ხარისხს. პრევენციული პროგრამებით, სახელმწიფო უზრუნველყოფს ნარკოტიკების უკანონო მოხმარებაში ადამიანების, განსაკუთრებით - ახალგაზრდების ჩაბმის თავიდან
არიდებას.

მმართველმა პარტიამ საარჩევნო პროგრამის პრეზენტაცია 8 სექტემბერს გამართა. ღონისძიებას, რომელსაც პარტიის წევრებთან ერთად სხვადასხვა კონფესიის წარმომადგენლებიც ესწრებოდნენ, პრემიერმინისტრი გიორგი კვირიკაშვილი უძღვებოდა.