საქართველოს ადვოკატთა ასოციაცია იუსტიციის საბჭოს ზოგიერთი წევრის მხრიდან თავდასხმას ეხმაურება და აღნიშნავენ, რომ ისინი დაუფარავად ავლენენ აგრესიას ადვოკატთა კორპუსის მიმართ, რაც მართლმსაჯულების მიუკერძოებლობას საფრთხეს უქმნის.

ასოციაციის რიგგარეშე საერთო კრებამ 3 თებერვალს მიიღო რეზოლუცია, რომელიც სასამართლო სისტემაში შექმნილ ვითარებას ეხება და საქართველოს პარლამენტს კრიზისის დაძლევის ინიციატივებით მიმართავს. როგორც ასოციაციაში აცხადებენ, რეზოლუციის მიღებას იუსტიციის საბჭოს ზოგიერთი მოსამართლე წევრის მხრიდან "აგრესიული და არაეთიკური" გამონათქვამები მოჰყვა.

"განხორციელდა მუქარა, მათი საპატიო სტატუსისთვის ძალიან შეუსაბამო დამოკიდებულებები, აგრეთვე პირდაპირი განაცხადი ადვოკატთა ასოციაციის დესტაბილიზაციზე. ცალკეული მოსამართლეები ახორციელებ მათი სტატუსისთვის სრულიად შეუსაბამო ქმედებებს, რაც ზიანს აყენებს სხვა მოსამართლეების რეპუტაციას", — განაცხადა ასოციაციის აღმასრულებელი საბჭოს წევრმა, მარიამ კუბლაშვილმა.

გარდა ამისა, ასოციაციის წევრების თქმით, იუსტიციის უმაღლესი საბჭოს მოსამართლე წევრი ადვოკატთა ასოციაციის წინააღმდეგ სასამართლოში მიმდინარე საქმეზე და ასოციაციის თავმჯდომარის სასარგებლოდ სასამართლო გადაწყვეტილებაზე აპელირებს.

"მსგავსი განცხადებები მაღალი სამოსამართლო თანამდებობის მქონე პირის მხრიდან სრულიად გაუმართლებელია და ბუნებრივად აჩენს საფუძვლიან ეჭვს ჯერ კიდევ მიმდინარე სასამართლო საქმის ობიექტურად განხილვასთან დაკავშირებით", — ნათქვამია ასოციაციის განცხადებაში.

ასოციაციის აღმასრულებელი საბჭო იუსტიციის საბჭოს მიმართავს, რათა მოუწოდოს თავის წევრებს თავი შეიკავონ არაეთიკური და შეურაცხმყოფელი განცხადებებისაგან საქართველოს ადვოკატთა ასოციაციის, ასოციაციის წევრებისა და თავმჯდომარის მიმართ. მათივე თქმით, მსგავსი ქმედებები ლახავს და აზიანებს სასამართლო სისტემის რეპუტაციასა და მართლმსაჯულების სანდოობის ინტერესებს.