13 წლის მოზარდის მკვლელობაში ბრალდებულ ბიძას რუსთავის საქალაქო სასამართლომ აღკვეთის ღონისძიების სახედ პატიმრობა შეუფარდა. საქმეზე გამოძიება განსაკუთრებული სისასტიკით განზრახ მკვლელობის მუხლით მიმდინარეობს, თუმცა დაცვის მხარე ამტკიცებს, რომ დაკავებულმა დანაშაული შეუცნობლად ჩაიდინა.

საქმის პროკურორის განცხადებით, ბრალდებულმა ძმის შვილს საყოფაცხოვრებო დანით 20-მდე ჭრილობა მიაყენა. მისივე თქმით, დაკავებისას მას ფსიქიკური აშლილობა აღენიშნებოდა რის საფუძველზეც დაინიშნა ფსიქიატრიული ექსპერტიზა.

საქმეზე გამოძება სისხლის სამართლის კოდექსის 109-ე მუხლის მე-2 და მე-3 ნაწილების "ბ" ქვეპუნქტებით წარედგინა, რაც დამნაშავისათვის წინასწარი შეცნობით არასრულწლოვნისა ან უმწეო მდგომარეობაში მყოფის განსაკუთრებული სისასტიკით მკვლელობას გულისხმობს. ჩადენილი დანაშაული ისჯება თავისუფლების აღკვეთით ვადით თექვსმეტიდან ოც წლამდე ან უვადოდ.