თბილისში საზოგადოებრივ ტრანსპორტსა და ტაქსებზე რეკლამის განთავსების უფლება კომპანია ალმამ მოიპოვა. კომპანიამ მუნიციპალიტეტის მიერ გამოცხადებულ აუქციონში გაიმარჯვა. ამის შესახებ დღეს, 9 თებერვალს გამართულ თბილისის მთავრობის სხდომაზე ვიცე-მერმა ირაკლი ხმალაძემ ისაუბრა:

"კონკურსი მივაბით თბილისის სატრანსპორტო კომპანიის კუთვნილი მეტროსა და ავტობუსების შერჩეულ ადგილებზე რეკლამის განთავსების უფლების აუქციონს. საკმაოდ ეფექტური ვაჭრობა შედგა. დაახლოებით, 11 მილიონი ლარიდან დაიწყო და 14 მილიონ ლარს ასცდა. კომპანია ალმა საკმაოდ კვალიფიციური კომპანიაა და ის უკვე მზადაა, პირველი მარტიდან ვალდებულება აიღოს".

ხმალაძის თქმით, კონკურსი ერთი კვირის წინ დასრულდა და გამარჯვებული კომპანია ლიცენზიის მფლობელ ტაქსებზე ორი სახის ვაუჩერს გასცემს, მათ შორის თეთრ ფერზე გადაღებვისა და ტაქსების ინტერიერის წმენდისას:

"ჩვენ შევქმენით საკმაოდ ეფექტური და კარგი კონცეფცია, რომლის მიხედვითაც, კომპანია ტაქსის მძღოლებისგან თანხებს არ მოითხოვს. ის უბრალოდ მათ სატრანსპორტო საშუალებებზე რეკლამას ორი წლის ვადით განათავსებს და ამის სანაცვლოდ, შეღებვის სამუშაოებს შეასრულებს".

ახალი რეგულაციები

თბილისში 2019 წლის პირველი ოქტომბრიდან თეთრი ფერის ტაქსები იმოძრავებენ. ამის შესახებ თბილისის მერმა, კახა კალაძემ დედაქალაქის მთავრობის 26 სექტემბრის სხდომაზე განაცხადა.

პირველი ოქტომბრიდან ტაქსის სერვისის განხორციელებას ვერ შეძლებენ სამკარიანი და მარჯვენა საჭიანი ავტომობილები.

კახა კალაძის ინფორმაციით, მოცემულ ეტაპზე, ტაქსის სერვისის განხორციელებაზე 6 200-ზე მეტი ნებართვაა გაცემული. პირველი ოქტომბრიდან კი, ამ საქმიანობის შესაბამისი ლიცენზიის გარეშე განხორციელება 200 ლარით დაჯარიმდება.

კახა კალაძე ამბობს, რომ სატრანსპორტო პოლიტიკის მეორე ეტაპია ვიზუალური სტანდარტი, ყველა ტაქსი მომავალი წლის პირველი ოქტომბრიდან თბილისში თეთრი უნდა იყოს.